हॅलो बॉलिवूड ऑनलाईन। बॉलिवूडची ‘पिग्गी चॉप्स’ अर्थात आघाडीची अभिनेत्री प्रियंका चोप्रा जोनास हिने नेहमीच आपल्या अभिनयाच्या जोरावर चाहत्यांचे प्रेम मिळवले आहे. आतातर फक्त बॉलिवूडच नाही तर हॉलिवूडमध्येही तिने स्वतःची अशी वेगळी जागा निर्माण केली आहे. त्यामुळे आता प्रियंकाचे संपूर्ण जगभरात खूप मोठी फॅन फॉलोव्हिंग आहे. तिचे चाहते आता साता समुद्रापारदेखील मोठ्या संख्येत आहेत. मध्यंतरीच हॉलिवूड गाजवल्यानंतर सध्या ती आगामी सिनेमा ‘सिटाडेल’च्या शूटिंगमध्ये अत्यंत व्यग्र आहे. मुख्य म्हणजे, या चित्रपटाच्या शूटिंगदरम्यान प्रियंकाला दुखापत झाली आहे. तिने सोशल मीडियावर फोटो शेअर करत चाहत्यांना माहिती दिली आहे. तिचा हा फोटो पाहून तिचे चाहते तिचं प्रकृतीची चिंता करीत आहे.
अभिनेत्री प्रियंका चोप्रा जोनासने नुकतेच सोशल मीडिया इंस्टाग्राम स्टोरीवर दोन फोटो शेअर केले आहेत. या फोटोत तिच्या कपाळावर झालेल्या गंभीर जखमा पहायला मिळत आहेत. इतकेच नव्हे तर, तिचे कपाळ रक्ताने माखलेले दिसत आहे. या स्टोरीतील पहिला फोटो शेअर करत तिने कोणते खरे आणि कोणते खोटे असे कॅप्शन दिले आहे. तर दुसऱ्या फोटोत प्रियांकाने भुवयांमध्ये झालेली जखम खरी असल्याचे सांगितले आहे. तर कपाळावरी जखम ही खोटी असल्याचे म्हटले आहे.
प्रियांका २०२१ च्या सुरुवातीपासूनच लंडनमध्ये सिटाडेल या चित्रपटाचे शूटिंग करत आहे. यात ती एका गुप्तहेराची भूमिका साकारत आहे. तिच्यासोबत रिचर्ड मॅडन आणि पेड्रो लिएंड्रो हे कलाकार या चित्रपटात मुख्य भूमिकेत दिसणार आहेत.
बॉलिवूड अभिनेत्री प्रियांका चोप्रा जोनास हि नेहमीच तिच्या आयकॉनिक फॅशन स्टाइलमुळे चर्चेत असते. याशिवाय फॅशन दिवा प्रियांका हॉलिवूड इंडस्ट्रीमध्ये चांगलीच सक्रिय झाली आहे. त्यामुळे सध्या ती हॉलिवूडमध्ये अग्रेसर भूमिका निभावताना दिसतेय. या चित्रपटाआधी प्रियांकाने ‘टेक्स्ट फॉर यू’ चित्रपटाचे शूटिंग पूर्ण केले आहे आणि हा चित्रपट लवकरच प्रेक्षकांच्या भेटीला येणार आहे. तसेच ती मॅट्रिक्स ४मध्येही दिसणार आहे. या हॉलिवूड चित्रपटांशिवाय ती ‘जी ले जरा’ या हिंदी चित्रपटात आलिया भट व कॅटरिना कैफसोबत झळकणार आहे.
Discussion about this post