हॅलो बॉलिवूड ऑनलाईन। पुन्हा एकदा तोच बालिशपणा घेऊन चावटपणाचा करायला आणि मनोरंजनाचा फुल्ल टू कहर करायला बॉईज ३ येतो आहे. अवधूत गुप्तेच्या ‘बॉईज’, ‘बॉईज २’ या चित्रपटांच्या भरघोस यशानंतर आता ‘बॉईज ३’ प्रेक्षकांसमोर प्रदर्शित होण्यास सज्ज आहे. हा चित्रपट येत्या १६ सप्टेंबर २०२२ रोजी रिलीज होणार आहे. अलीकडेच चित्रपटाचं मोशन पोस्टर आणि टिझर रिलीज झाला. यामध्ये नवा चित्रपट, नवी कथा मग नवी हिरोईनसुद्धा असल्याचे समजले. अभिनेत्री विदुला चौगुले एकदम हटके अंदाजात या चित्रपटात दिसते आहे. यानंतर आता चित्रपटातील पहिले गाणे उद्या रिलीज होणार असून त्याचा टिझर रिलीज झाला आहे. बॉईज मध्ये गाजलेलं लग्नाळू हे गाणं आणि नवीन व्हर्जन मध्ये येत आहे.
बॉईज ३ मध्ये आम्ही लग्नाळू… या गाण्याचं नवं व्हर्जन आपल्याला ऐकायला आणि पाहायला मिळणार आहे. या गाण्याचे नाव लग्नाळू २.o असे आहे. आता हे व्हर्जन हटके आणि धमाकेदार आहे हे काही वेगळं सांगायची गरज नाही. या गाण्याची पहिली झलकच बरंच काही बोलून जाते आहे. या गाण्यात विदुलादेखील वेगळ्याच अंदाजात दिसते आहे. आता प्रतीक्षा आहे काही तासांची. कारण उद्या हे गाणे प्रदर्शित होणार आहे. एवरेस्ट एंटरटेनमेंटच्या अधिकृत इंस्टाग्राम पेजवर या गाण्याचा टिझर रिलीज केला आहे. सुप्रीम मोशन पिक्चर्स प्रा. लि. प्रोडक्शन अंतर्गत एव्हरेस्ट एंटरटेनमेंटच्या सहयोगाने या चित्रपटाची निर्मिती करण्यात आली आहे. तर लालासाहेब शिंदे, राजेंद्र शिंदे व संजय छाब्रिया हे ‘बॉईज ३’चे निर्माते आहेत.
सुप्रसिद्ध मराठी गायक अवधूत गुप्ते प्रस्तुत ‘बॉईज ३’ या चित्रपटाचे दिग्दर्शन विशाल सखाराम देवरुखकर यांनी केले आहे. या चित्रपटात तेच ३ बॉईज पुन्हा धमाल करताना दिसणार आहेत. म्हणजे अभिनेता पार्थ भालेराव हा ढुंग्या पात्र साकारत आहे. तर अभिनेता प्रतीक लाड हा धैर्या हे पात्र साकारताना दिसणार आहे. तसेच अभिनेता सुमंत शिंदे हा कबीर हे पात्र साकारताना दिसणार आहे. पुन्हा एकदा यांच्या आयुष्यात एक मुलगी येणार आहे आणि यांच्या आयुष्याचा बाजार होणार आहे हि या कथानकाची स्ट्रॉंग बाजू आहे. एकंदरच हा चित्रपट फार मजा मस्ती आणि धमाल तसेच एक सामाजिक शिकवण देणारा असणार आहे.
Discussion about this post