हॅलो बॉलिवूड ऑनलाईन| प्रेक्षकांची अत्यंत लाडकी वाहिनी झी मराठीवर अनेक नव्या मालिका सुरू झाल्या आहेत. यांपैकी काही मालिकांनी तर काही दिवसातच बाजी मारली आहे. यांपैकी एक मालिका म्हणजे ‘ नवा गडी नवं राज्य ‘. या मालिकेत देवाज्ञा झालेल्या रमाचा संसार सांभाळायला आनंदी सोनपावलांनी येते. पण रमा आपला संसार काही सोडून गेलेली नाही. ती अधून मधून आनंदीला त्रास देऊ पाहते. रमाची लेक चिंगी म्हणजेच रेवा आपल्या नव्या आईला मान्य करायला तयार नाही. त्यामुळे आनंदी आणि चिंगी हे समीकरण अजूनतरी लांब लांब आहे. पण यावेळी बाप्पाच्या कृपेने त्यांच्यातल्या दुरव्यात थोडासा मायेचा ओलावा आला आहे.
मालिकेच्या आगामी भागात राघव आनंदीसाठी शॉपिंग करून येईल आणि त्याचा मित्र भेटेल. जो त्याला गणेशोत्सवात घरी आमंत्रित करतो. या संभाषणात आनंदीला समजत की रमाच्या निधनानंतर कर्णिकांच्या घरात गणपती बसवलेला नाही. मग काय.. आनंदी स्वतः एक उत्तम मूर्तिकार असल्याचे पहिल्याच भागात दाखवले होते. त्यामुळे आनंदी बाप्पा साकारायला सुरुवात करते. तिला गुपचूप पाहणारी चिंगी आनंदीला दिसते. आनंदी चींगीला मदतीसाठी बोलावते आणि मग बाप्पाची मूर्ती बनविण्यात चिंगी सुद्धा रमून जाते. बाप्पाला साकारताना आनंदी आणि चिंगी दोघींच्याही चेहऱ्यावर आनंद असतो आणि त्या एकमेकांसोबत रुळतात.
हा प्रसंग पाहून बाप्पाने त्यांच्यातील दुरावा कमी करायला सुरुवात केली आहे असे वाटते. सध्या झी मराठीच्या ऑफिशियल पेजवर हा प्रोमो झळकतो आहे आणि यावर नेटकरी प्रतिक्रिया देत आहेत. मालिका सुंदर आहे, प्रत्येक कलाकाराची भूमिका उत्तम आहे अशा प्रतिक्रिया प्रेक्षक देत आहेत.
गणेशोत्सवाच्या निमित्ताने ही मालिका एका वेगळ्या वळणावर येईल असेही काहींनी म्हंटले आहे. सध्या या मालिकेने फार कमी वेळात प्रेक्षकांचे मन जिंकले आहे. आनंदी तिच्या संसारात रमते आहे तर रमाला मात्र तिचा संसार सोडवत नाहीये. आता उत्सुकता ही आहे की आनंदीला भेटणाऱ्या वहिनी दुसरं तिसरं कुणी नसून रमा म्हणजे तिची सवत आहे हे कधी समजतंय आणि समजल्यावर ती काय करेल..?
Discussion about this post