हॅलो बॉलिवूड ऑनलाईन। संपूर्ण महाराष्ट्राचे आद्यदैवत म्हणजे छत्रपती शिवाजी महाराज. त्यांचा इतिहास इतका जाज्वल्य आणि धगधगता आहे कि यातील प्रत्येक पान सुवर्ण आहे. याच भारतीय इतिहासातील सुवर्ण पण म्हणजे अनन्य साधारण व्यक्तिमत्व बाजीप्रभू देशपांडे. येत्या दिवाळीत रयतेचा राजा आणि नरवीर बाजी यांच्यावर आधारित ‘हर हर महादेव’ हा चित्रपट प्रदर्शित होत आहे. या चित्रपटातील दमदार गाणी आधीच प्रेक्षकांना भावताना दिसत आहेत. यासाठी सर्व रसिकप्रेक्षकांची चांगली दाद मिळत असतानाच आता या चित्रपटाचा टिझर प्रदर्शित झाला आहे. या टीझरसाठी राज ठाकरे यांनी आवाज दिला आहे. हा टिझर मनसेच्या अधिकृत पेजवरून शेअर करण्यात आला आहे. तो पाहून प्रेक्षकांची चित्रपटाविषयीची उत्सुकता आणखीच वाढली आहे.
मराठी चित्रपटसृष्टीत नेहमीच नवनवीन प्रयोग होत राहिले आहेत. यंदा याआधी कधीच न झालेला असा प्रयोग ‘हर हर महादेव’ या चित्रपटाद्वारे करण्यात आला असून हा सिनेमा फक्त मराठीतच नाही तर पाच भारतीय भाषांमध्ये प्रदर्शित होणार आहे.
सुलतानी अंधार पसरलेला असताना मा जिजाऊंनी स्वातंत्र्यतेचे पाहिलेले स्वप्न, बारा हजार शत्रूंवर विजय मिळवणारे आपले तीनशे मावळे आणि बाजीप्रभूंच्या रणझुंजार कर्तृत्वावर भाष्य करणारा हा चित्रपट आहे. दिवाळी आणि भारतीय ऐतिहासिक संस्कृती यांचे एक वेगळंच नातं आहे.
अभिजीत देशपांडे यांचे लेखन आणि दिग्दर्शन असलेल्या ‘हर हर महादेव’ या चित्रपटाची निर्मिती सुनील फडतरे यांच्या श्री गणेश मार्केटिंग अँड फ्रेंड्स’ची असून यात सुबोध भावे, शरद केळकर ,अमृता खानविलकर यांच्या प्रमुख भूमिका आहेत. येत्या दिवाळीत २५ ऑक्टोबरला ‘हर हर महादेव’ सर्वत्र प्रदर्शित होत आहे. हा चित्रपट सकारात्मकतेची, शौर्याची, देश प्रेमाची ज्योत पेटवणार यात काही शंकाच नाही.
Discussion about this post