हॅलो बॉलिवूड ऑनलाईन। बॉलिवूड अभिनेता पंकज त्रिपाठी आगामी काळात भारताचे माजी पंतप्रधान अटल बिहारी वाजपेयी यांच्या बायोपिकमध्ये त्यांची भूमिका साकारणार आहेत, या बातमीनंतर त्रिपाठी सतत चर्चेत राहिले आहेत. मुळात पंकज त्रिपाठी हे एक गुणी अभिनेता असल्यामुळे त्यांचे चाहते आणि प्रेक्षकवर्ग त्यांना अटल बिहारी वाजपेयी यांच्या भूमिकेत पाहण्यासाठी उत्सुक झाले आहेत. अशातच पंकज त्रिपाठी यांच्या एका पोस्टने सर्वांचे लक्ष वेधून घेतले आहे. ज्यामध्ये त्रिपाठी यांनी आपल्या भावना आणि उत्साह अटल बिहारी वाजपेयी यांना समर्पित केला आहे.
अभिनेता पंकज त्रिपाठी यांनी त्यांच्या अधिकृत सोशल मीडिया हॅण्डल इंस्टाग्रामवर एक पोस्ट शेअर केली आहे. या पोस्टमध्ये त्यांनी लिहिले आहे कि, ‘मनात रोमांच दाटून आलाय, थोडीशी भीती देखील वाटतेय, मनात अनेक भावनांचा कल्लोळ आहे, पण सिनेमाप्रतीची निष्ठा बळ वाढवतेय आणि हा सगळा उत्साह अटलजींना समर्पित.. आता ‘मैं अटल हूँ…’. अटल बिहारी वाजपेयी यांच्या व्यक्तिमत्त्वाला पडद्यावर साकार करणं म्हणजे एखाद्या कठीण परिक्षेला बसण्यासारखंच आहे. पण या परिक्षेसाठी अटलजींचे आशीर्वाद आमच्या सोबत आहेत आणि आम्हाला अटळ विश्वासही आहे. ‘मैं अटल हूँ…’ लवकरच.’
हि पोस्ट वाचल्यानंतर अभिनेता पंकज त्रिपाठी यांनी अटल बिहारी वाजपेयी यांच्यावरील बायोपिकचे नाव जाहीर केल्याचे समजते. या आगामी बायोपिक चित्रपटाचे नाव ‘मैं अटल हूँ…’ असे असल्याचे हि पोस्ट सूचित करते आहे. विशेष म्हणजे या बायोपिक सिनेमाचे दिग्दर्शन प्रसिद्ध मराठी दिग्दर्शक रवी जाधव करत आहेत. पंकज त्रिपाठी यांनी शेअर केलेली हि पोस्ट प्रचंड व्हायरल होत असून अनेक चाहते अटलजींची व्यक्तिरेखा पंकज त्रिपाठी उत्तम साकारणार असा विश्वास दर्शवित आहेत. हा बायोपिक सिनेमा अटल बिहारी वाजपेयी यांच्या जन्मदिनी म्हणजेच येत्या नव्या वर्षाच्या अखेरीस २५ डिसेंबर, २०२३ रोजी प्रदर्शित केला जाणार असल्याचे सांगितले जात आहे.
Discussion about this post