हॅलो बॉलिवूड ऑनलाईन। झी मराठीवरील अत्यंत लोकप्रिय कॉमिक शो ‘चला हवा येऊ द्या’मधून लोटपोट करून खळखळून हसवणारा कॉमिक अभिनेता कुशल बद्रिके हा प्रेक्षकांचा अतिशय लाडका आहे. कुशलने साकारत असलेल्या विविध भूमिका, पात्र यांमधील त्याचा अवलीपणा प्रेक्षकांना प्रचंड आवडतो. त्यामुळे एक उत्तम कॉमेडी नट म्हणून कुशल बद्रिकेकडे पाहिले जाते. खूप कॉमेडी केल्यानंतर आता ‘रावरंभा’ या ऐतिहासिक मराठी चित्रपटात कुशल बद्रिके खलनायकी पात्र साकारतो आहे. मुख्य म्हणजे तो पहिल्यांदाच एक खलनायक साकारत असल्यामुळे प्रेक्षक त्याच्या या भूमिकेबाबत उत्सुक आहेत.
अनुप जगदाळे यांच्या ‘रावरंभा’ या ऐतिहासिक चित्रपटात कुशल बद्रिके हा क्रूरकर्मा ‘कुरबतखान’च्या भूमिकेत दिसणार आहे. हि अतिशय दमदार व्यक्तिरेखा असून यातील कुशलचा फर्स्ट लूक समोर आला आहे. एका वेगळ्या ढंगात, अंदाजात आणि रूपात कुशल आपल्या भेटीस येतो आहे. त्याचा हा लूक एका क्षणात धडकी भरवणारा आहे. विनोदी भूमिकांनंतर कुशल पहिल्यांदाच खलनायक साकारत असला तरीही तो एक उत्तम नट असल्यामुळे या भूमिकेला तो योग्य न्याय देईल अशी आशा आहे.
येत्या १२ मे २०२३ रोजी इतिहासातील हे ‘मोरपंखी पान’ रुपेरी पडद्यावर उलगडणार आहे. शशिकांत पवार प्रोडक्शन अंतर्गत येणाऱ्या ‘रावरंभा’ चित्रपटाची पटकथा आणि संवाद प्रताप गंगावणे यांचे आहेत. तर छायांकन संजय जाधव, संकलन फैजल महाडिक यांचे आहे. चित्रपटाचे सहनिर्माते अजित भोसले, संजय जगदाळे आहेत आणि कार्यकारी निर्माते महेश भारांबे, अन्वय नायकोडी आहेत. तर गुरु ठाकूर आणि क्षितीज पटवर्धन यांनी गाणी लिहिली असून त्यांना अमितराजने संगीत दिले आहे.
Discussion about this post