हॅलो बॉलिवूड ऑनलाईन। आज मदर्स डेनिमित्त जगातील प्रत्येक व्यक्ती आपल्या आईसाठी हा दिवस खास करू पाहत असेल. खरंतर आईसाठी एखादा दिवस खास काय साजरा करायचा..? जिच्यामुळे आपण रोजचा नवा दिवस पाहू शकत आहोत तिला एकाच दिवशी स्पेशल काय फील करून द्यायचं..? असं असलं तरीही दगदगीच्या आयुष्यात हा एक दिवस का होईना फक्त आईला वेळ द्यायला हरकत काय आहे… नाही का? म्हणूनच आजचा दिवस हा खास आहे. या दिवसाचे औचित्य साधून मनोरंजन विश्वातील कलाकार मंडळी देखील आईसाठी खास पोस्ट शेअर करत आहेत. ज्यामध्ये हेमांगी कवीचाही समावेश आहे. तिने आपल्या आईसाठी लिहिलेली हि पोस्ट व्हायरल झाली आहे.
हेमांगीने आईसोबतचा फोटो पोस्ट करून लिहिलंय की, ‘Mummy! जगातली सुंदर स्त्री! प्रत्येकाला असं वाटतं पण माझी आई खरंच सुंदर आहे. तिच्यासारखं ५०% सौंदर्य मला मिळालं असतं तर? पण आपण पडलो पितृमुखी! म्हटलं सौंदर्य नाही तर नाही बाकी गुण तरी घेऊयात. काही गुण अनुवंशिक आलेत काही अथक प्रयत्नांनी आणलेत. तरी ही तुझी सर नाहीच. तुझ्यासारखा त्याग, परिवारासाठी असलेली माया, प्रेम, पप्पांना डोळे झाकून दिलेली साथ, संसारात घेतलेले कष्ट, संपाच्या काळात दाखवलेला संयम, घरात किती भांडणे झाली तरी पाहुणे, नातेवाईक घरी आले की जणू काही झालंच नाही म्हणून केलेलं त्याचं स्वागत, घरात किती ही माणसं आली तरी त्यांच्यासाठी केलेला स्वंयपाक, महीना आखिरीला पैसे नसले तरी तुझं खंबीर असणं’.
हेमांगीने पुढे लिहिलंय कि, ‘प्रत्येक परिस्थितीला हसत मुखाने सामोरी जाणं, व्यवहारज्ञान, तल्लख बुद्धी (माझी आई सातवी पास आहे त्यावेळचं ते मॅट्रिक पास समजलं जायचं आणि नोकरीची offer ही आली होती), हजरजबाबीपणा, माणसांना ओळखण्याचं कसब! प्रत्येकाच्या आयुष्यात चढ-उतार असतात पण तुझ्याबाबतीतले चढ- उतार बघता मला कायम प्रश्न पडतो आणि कुतूहल वाटतं की कसं कसं निभावून नेतेस..? आताही! प्रत्येक जन्म तुझ्या पोटी यावा हीच ईच्छा!’. अशी पोस्ट शेअर करत हेमांगीने आईसाठी मनातील भावना व्यक्त केल्या आहेत.
Discussion about this post