हॅलो बॉलिवूड ऑनलाईन। थिएटर इतकंच ओटीटी प्लॅटफॉर्मसुद्धा आता मनोरंजनासाठी बेस्ट प्लॅटफॉर्म म्हणून गाजतो आहे. ओटीटीवर नवे चित्रपट, वेब शो, वेब सिरीज असे मनोरंजनाचे बरेच प्रकार आहेत. ज्यामुळे दिवसागणिक ओटीटी प्लॅटफॉर्मचं क्रेझ वाढत चाललं आहे. प्रचंड गाजलेल्या ‘असुर’ या वेबसीरिजच्या आगामी भागाची प्रतीक्षा असताना आता मोठी अपडेट समोर आली आहे. ‘असुर सिझन २’ लवकरच प्रेक्षकांच्या भेटीला येणार असून पुन्हा एकदा अर्शद वारसी मन जिंकायला येतोय.
सुरुवातीला ‘असुर’ या सिरिजला थंड प्रतिसाद होता. मात्र हळूहळू ही सीरिज प्रेक्षकांनी डोक्यावर घेतली आणि त्यामुळे हि सिरीज गाजली. सायको थ्रिलर ड्रामा असणारी हि सिरीज अशी आहे कि पुढे काय होणार याबाबत सतत उत्सुकता राहते. तेव्हापासून या सिरिजच्या पुढच्या सीझनबाबत मोठी उत्सुकता पहायला मिळत आहे. असुरच्या पहिल्या सिजनमध्ये अर्शद वारसी आणि बरुण सोबती या दोन्ही अभिनेत्यांनी पछाडल्यासारखं काम करत प्रेक्षकांचं मन जिंकलं. आता सीजन २ सुद्धा ते गाजवतील अशी आशा आहे.
या सीरिजबद्दल एक नवीन अपडेट समोर आली आहे. त्यानुसार, ‘असुर’चा पहिला सीझन ‘वूट’ या लोकप्रिय ओटीटी प्लॅटफॉर्मवर प्रदर्शित झाला होता. आता याच सिरीजचा पुढचा भाग अर्थात असुर सिझन २ हा ‘जिओ सिनेमा’ या ओटीटी प्लॅटफॉर्मवर प्रदर्शित होणार आहे. याबाबत नुकतीच जिओने माहिती दिली आहे. ज्यामध्ये ‘असुर सीजन २’ या बहुप्रतिक्षित सिरीजचा ट्रेलर दिसतो आहे. या व्हिडीओमध्ये ‘असुर’च्या दुसऱ्या सीझनची झलक पहायला मिळाली आहे. शिवाय हा सिझन या १ जून २०२३ मध्ये प्रेक्षकांच्या भेटीला येणार असल्याचे सांगण्यात येत आहे. यामध्ये अर्शद वारसी, वरुण सोबती, रिद्धी डोग्रा, आणि अनुप्रिया गोएंका हे कलाकार मुख्य भूमिकांमध्ये आहेत.
Discussion about this post