हॅलो बॉलिवूड ऑनलाईन। कलर्स मराठी वाहिनीवरील ‘भाग्य दिले तू मला’ हि मालिका प्रेक्षकांच्या दैनंदिन आयुष्याचा भाग झाली आहे. या मालिकेत मुख्य भूमिकेत असणारे राज आणि कावेरी हे तर प्रेक्षकांच्या घरातील सदस्यांप्रमाणे झाले आहेत. त्यांच्या आयुष्यातील सुखाचा आणि दुःखाचा प्रेक्षकांवरही परिणाम होत असतो. या जोडीवर प्रेक्षक भरभरून प्रेम करताना दिसत आहेत. अशातच मालिकेच्या एका प्रोमोमुळे प्रेक्षकांमध्ये नाराजीचे वातावरण निर्माण झाले आहे. प्रोमोवर येत्या भागात कावेरीचा जीव धोक्यात येणार आहे आणि यामुळे कदाचित नायक- नायिका दुरावणार आहेत.
अभिनेता विवेक सांगळे आणि अभिनेत्री तन्वी मुंडले हे कलाकार राज अन कावेरीची भूमिका साकारत आहेत. त्यांच्या जोडीने प्रेक्षकांच्या मनात घर केले आहे. मालिकेत त्यांच्या लग्नानंतर मोठमोठे ट्विस्ट दाखवले गेले. मध्यंतरी रत्नमाला मोहिते म्हणजेच राजवर्धनच्या आईची सगळी प्रॉपर्टी वैदेही आणि सानियाने हस्तगत केल्यामुळे त्यांचा ‘माहेरचा चहा’ या कंपनीगळती, त्यांनी खाल्लेल्या खचता आणि नव्याने सुरुवात असे कथानक रंजक पद्दतीने मांडण्यात आले. या सर्व संकटांवर मात केल्यानंतर राजच्या आईने एक नवी सुरुवात म्हणून राज-कावेरीला हनिमूनला पाठवले असता नियतीला त्यांचे सुख मान्य नाही असेच दिसत आहे.
सानियाने राज आणि कावेरीच्या घातपाताचा कट रचला असून येत्या भागात ते हनिमूनला गेले असताना एक अज्ञात व्यक्ती बाईकवरून येताना दिसतो. कावेरी फोटोसाठी पोज देत असताना तिच्या गळ्यातील मंगळसूत्र ओढून तो तिला धक्का मारून दरीत ढकलतो, असे व्हायरल प्रोमोमध्ये दाखवण्यात आले आहे. हा प्रोमो पाहून प्रेक्षकांना मोठा धक्का लागला आहे आणि त्यांनी या ट्विस्टबाबत नाराजी व्यक्त केली आहे. एका युजरने म्हटले आहे कि, ‘ही सीरिअल आवडत्या सीरिअल पैकी एक होती. आता काय बावळटसारख दाखवताय. आम्ही आनंदी मालिका बघू शकतो अस भयंकर दुःख कष्ट दाखवायची काही गरज नाही’. आणखी एकाने म्हटले, ‘असे दाखवायला नको होते, जर दाखवायचेच असेल तर कावेरीला परत जिवंत दाखवा नाही तर मालिका बघणार नाही’. आता मालिकेचे कथानक पुढे कसे सरकते हे पाहण्यासाठी प्रेक्षकही आतुर झाले आहे.
Discussion about this post