हॅलो बॉलिवूड ऑनलाईन। बॉलीवूड सिनेविश्वातील आघाडीचा अभिनेता आयुष्मान खुरानावर काळानं मोठा घाला घातला आहे. आयुष्मानच्या चाहत्यांसाठी अत्यंत मोठी आणि धक्कादायक बातमी समोर आली आहे. नुकत्याच मिळालेल्या माहितीनुसार, प्रसिद्ध अभिनेता आयुष्मान खुरानाचे वडील पंडीत पी. खुराना यांचे निधन झाले आहे. शुक्रवार, १९ मे २०२३ रोजी सकाळी चंदीगढ येथील एका खासगी रुग्णालयात उपचारादरम्यान त्यांची प्राणज्योत मालवली आहे. आयुष्मानचा भाऊ आणि अभिनेता अपारशक्ती खुरानाच्या प्रवक्त्याने अधिकृत निवेदन सादर करत प्रसिद्ध करून त्यांच्या वडिलांचे निधन झाल्याच्या वृत्ताची पुष्टी केली आहे.
मिळालेल्या माहितीनुसार, गेल्या काही दिवसांपासून आयुष्मान खुरानाचे वडील पंडित पी. खुराना हे हृदय विकाराच्या आजाराने ग्रस्त होते. त्यांच्यावर मोहालीतील रुग्णालयात तज्ञ डॉक्टरांच्या देखरेखीखाली उपचार सुरू होते. मात्र उपचारादरम्यान आज सकाळी १०:३० वाजता त्यांनी अखेरचा श्वास घेतला आणि त्यांना देवाज्ञा झाली. पंडित पी. खुराना यांच्या निधनाने संपूर्ण खुराना कुटुंबावर दुःखाचा महाकाय डोंगर कोसळला आहे. आयुष्मान आणि अपराजित यांच्या डोक्यावरून वडिलांचे छत्र हरपले आहे.
सूत्रांनी दिलेल्या माहितीनुसार, पंडित पी. खुराना यांच्या मृतदेहावर आज मृत्यूदिनी १९ मे २०२३ रोजी सायंकाळी ५:३० वाजता विधिवत अंत्यसंस्कार करण्यात येणार आहेत. आयुष्मान खुरानाचे त्याच्या वडिलांसोबत अत्यंत जवळचे असे भावनिक नाते होते. त्यामुळे आयुष्मान अनेकदा वडिलांसोबतचे फोटो सोशल मीडियावर शेअर करायचा. वडिलांसाठी लिहिलेल्या खास पोस्टमधून आयुष्मानचे वडिलांवर असलेले प्रेम नेहमीच स्पष्ट दिसून यायचे. आयुष्मानचे वडील पंडीत पी. खुराना हे प्रसिद्ध ज्योतिषतज्ञ होते आणि त्यांचा ज्योतिष शास्त्रावर अत्यंत सखोल अभ्यास होता. या अभ्यासाच्या जोरावर त्यांनी ज्योतिष शास्त्राविषयी अनेक पुस्तकेही लिहिली आहेत.
Discussion about this post