हॅलो बॉलिवूड ऑनलाईन। ‘शूssss कोई है’, ‘शक्तिमान’, ‘गुटुर गू’ अशा विविध मालिकांमध्ये महत्त्वपूर्ण भूमिकेतून प्रेक्षकांच्या मनावर रुंजी घातलेले प्रसिद्ध अभिनेते के. के. गोस्वामी यांच्याबाबत मोठी बातमी समोर आली आहे. गोस्वामी यांचा मुलगा एका मोठ्या दुर्घटनेतून बचावल्याचे समजले आहे. मुंबईतील एसव्ही रोडवर त्यांच्या गाडीने पेट घेतला आणि यावेळी त्यांचा मुलगा नवदीप गाडी चालवत होता. या घटनेतून तो सुखरूप बचावला असला तरीही संपूर्ण गोस्वामी कुटुंबाला चांगलाच धक्का बसला आहे. या घटनेची माहिती स्वतः गोस्वामी यांनी सोशल मीडियावर पेटत्या गाडीचा व्हिडीओ शेअर करत दिली आहे.
या व्हिडिओसोबत गोस्वामी यांनी लिहिले कि, ‘काल माझ्या गाडीमध्ये आग लागली होती.. पण आपल्या आशीर्वादाने माझा मुलगा थोडक्यात बचावला आहे’. मीडिया रिपोर्ट्सनुसार, मुंबईतील एस. व्ही. रोडवर हि घटना घडली. अभिनेते के. के. गोस्वामी यांचा मुलगा नवदीप चारचाकीने आपल्या घरातून फिल्मिस्तान स्टुडिओजवळ असलेल्या कॉलेजला जात होता. यावेळी नवदीप कार चालवीत असताना गाडीने अचानक पेट घेतला आणि गाडीला पूर्ण आग लागली. यानंतर अग्निशमन दल आणि मुंबई पोलिसांच्या पथकाला माहिती मिळताच त्यांनी घटनास्थळी धाव घेतली आणि परिस्थिती नियंत्रणात आणली.
या अपघातातून के. के. गोस्वामी यांचा मुलगा नवदीप अगदी थोडक्यात बचावला आहे. या दुर्घटनेत नवदीपला कोणतीही दुखापत झालेली नाही. मात्र गाडीने अचानक पेट घेण्याचे कारण काय..? याचा तपास पोलीस करत आहेत. अभिनेते के. के. गोस्वामी हे टीव्ही जगतातील अत्यंत लोकप्रिय अभिनेते आहेत. आजतागायत त्यांनी विविध हिंदी, मराठी, बंगाली, गुजराती, भोजपुरी अशा विविध भाषिक मालिकांमध्ये काम केले आहे.
गोस्वामी यांनी ‘शूssss कोई है’, ‘शक्तिमान’, ‘गुटुर गू’, ‘शका लका बूम बूम’, ‘ज्युनियर जी’, ‘सीआयडी’, ‘चक्रवर्ती अशोक सम्राट’, ‘भाभी जी घर पर हैं’ या मालिकांमध्ये महत्वपूर्ण भूमिका साकारल्या आहेत. या मालिकांमध्ये त्यांनी साकारलेल्या प्रत्येक भूमिकेने प्रेक्षकांची मने जिंकली आहेत.
Discussion about this post