हॅलो बॉलिवूड ऑनलाईन। सुलतानी अंधार पसरलेला असताना माता जिजाऊंनी स्वातंत्र्यतेचे पाहिलेले स्वप्न, बारा हजार शत्रूंवर विजय मिळवणारे आपले तीनशे मावळे आणि बाजीप्रभूंच्या झणाणत्या रणझुंजार कर्तृत्वाचे भाष्य करणारा ‘हर हर महादेव’ हा चित्रपट आपल्या भेटीस येण्यास सज्ज आहे. येत्या दिवाळीत हा चित्रपट सर्वत्र प्रदर्शित होणार असून प्रेक्षकांना चित्रपटाबाबत वेगळीच उत्सुकता आहे. या चित्रपटाला अत्यंत तगडी स्टारकास्ट लाभली आहे.
झी स्टुडियोजची निर्मिती असलेल्या आणि अभिजित देशपांडे यांच्या दिग्दर्शनाने सजलेल्या या चित्रपटातील अत्यंत महत्वपूर्ण भूमिकेवरून पडदा उठला आहे. हि भूमिका म्हणजे पन्हाळ्याभोवती नागासारखा विळखा घालून बसलेला सिद्धी जोहर. या भूमिकेत आपल्याला अभिनेता मिलिंद शिंदे दिसणार आहेत. त्यामुळे प्रेक्षकांची उत्सुकता दहापट वाढली आहे.
या भूमिकेची ओळख करून देताना झी स्टुडिओजने त्यांच्या अधिकृत सोशल मीडिया हॅण्डल इंस्टाग्रामवर हे या भूमिकेचे पोस्टर रिलीज केले आहे. या पोस्टरसोबत त्यांनी कॅप्शनमध्ये लिहिले आहे कि, ‘छत्रपती शिवाजी महाराज यांचा खात्मा करण्याचा ज्याने विडा उचलला, हजारोंच्या सैन्याने पन्हाळ्याभोवती वेढा घालून नाकी नऊ आणले, तो क्रुर, कारस्थानी, स्वराज्य भक्षक, आदिलशहाचा गद्दार सरदार सिद्दी जौहर. त्याच्या भूमिकेत अभिनेते मिलिंद शिंदे. लढण्यासाठी लाखो हत्तींचं बळ देणाऱ्या शिवमंत्राचा आवाज संपूर्ण हिंदुस्थानात घुमणार… येत्या दिवाळीत, २५ ऑक्टोबरपासून ‘हर हर महादेव’ मराठी, हिंदी, तमिळ, तेलुगू आणि कन्नड या ५ भाषांमधून आपल्या भेटीला येणार.’
भारताचा इतिहास प्रत्येकाला कळावा, म्हणून एक नाही, दोन नाही तर तब्बल पाच विविध भाषांतून ‘हर हर महादेव’ हा चित्रपट प्रदर्शित होत आहे. अभिजीत देशपांडे यांचे लेखन आणि दिग्दर्शन असलेल्या ‘हर हर महादेव’ या चित्रपटाची निर्मिती सुनील फडतरे यांच्या श्री गणेश मार्केटिंग अँड फिल्म्स’ने केली आहे. येत्या दिवाळीत २५ ऑक्टोबरला ‘हर हर महादेव’ सर्वत्र प्रदर्शित होत आहे.
या चित्रपटात शिवरायांच्या भूमिकेत सुबोध भावे तर त्यांच्या पत्नी महाराणी सईबाईंच्या भूमिकेत सायली संजीव दिसणार आहे. याशिवाय बाजीप्रभूंच्या भूमिकेत शरद केळकर आणि त्यांच्या पत्नी सोनाबाईंच्या भूमिकेत अमृता खानविलकर दिसणार आहे. तसेच निष्ठावान आबाजी विश्वनाथ यांच्या भूमिकेत हार्दिक जोशी तर विश्वासू मावळे धनाजी म्हसकर यांच्या भूमिकेत नितीश चव्हाण दिसणार आहे.
Discussion about this post