हॅलो बॉलिवूड ऑनलाईन। ‘घायल’, ‘दामिनी’, ‘अंदाज अपना अपना’ यांसारखे सुपर डुपर हिट आणि वेगवेगळ्या धाटणीचे चित्रपट बॉलिवूड सिनेसृष्टीला देणारे दिगदर्शक राजकुमार संतोषी तब्बल ९ वर्षांनी पुन्हा एकदा कमबॅक करत आहेत. यावेळी विचारांचे युद्ध ते मोठ्या पडद्यावर घेऊन येत आहेत. आजपर्यंत प्रसिद्ध दिग्दर्शक राजकुमार संतोषी यांनी आपल्या अनेक चित्रपटातून सामाजिक मुद्द्यांवर भाष्य केले आहे. यानंतर आता लवकरच ‘गांधी- गोडसे एक युद्ध’ या चित्रपटाच्या माध्यमातून एक वेगळी कलाकृती घेऊन ते येत आहेत. या चित्रपटाची पहिली झलक अलीकडेच समोर आली असून यामधून त्यांची लेक तनिषासुद्धा मोठ्या पडद्यावर झळकणार आहे.
‘गांधी- गोडसे एक युद्ध’ या चित्रपटाची पहिली झलक समोर आल्यानंतर या चित्रपटात मराठमोळा अभिनेता/दिग्दर्शक चिन्मय मांडलेकर हा नथुराम गोडसे यांच्या भूमिकेत दिसणार असल्याचे समोर आले आहे. यानंतर आता या चित्रपटाचे दिग्दर्शक राजकुमार संतोषी यांची लेक तनिषा संतोषी या चित्रपटातून बॉलिवूड सिनेविश्वात पदार्पण करत आहे.
या चित्रपटातील तिचा पहिला लूक सोशल मीडियावर शेअर करण्यात आला आला आहे. तिनेही आपल्या इंस्टाग्राम हँडलवर आपल्या पहिल्या सिनेमातील स्वतःचा लूक शेअर केला आहे.अभिनेत्री तनिषा संतोषी तिच्या वैयक्तिक आयुष्यात प्रचंड बोल्ड आहे. मात्र सिनेमाच्या कथानकाच्या आवश्यकतेनुसार तिचा सिंपल लूक समोर आला आहे. जो तिच्या चाहत्यांना प्रचंड आवडतो आहे.
आपल्या पहिल्या चित्रपटातील स्वतःच्या भूमिकेची पहिली झलक शेअर करताना तनिषाने कॅप्शनमध्ये लिहिले आहे कि, ‘मी खूप दिवसांपासून या क्षणाची वाट पाहत आहे आणि तो क्षण एकदाचा आला. एका दूरदर्शी चित्रपट निर्मात्याने बनवलेल्या चित्रपटाचा एक छोटासा भाग असल्याबद्दल मी अत्यंत आभारी आहे. माझ्या व्यक्तिरेखेचा पहिला लूक शेअर करताना खूप भावूक वाटत आहे. मला तुमच्या सर्वांचे आशीर्वाद आणि प्रेम हवे आहे.’ या चित्रपटाची पटकथा राजकुमार संतोषी यांची असून दिग्दर्शनाची सूत्र देखील त्यांच्याच हाती आहेत. तर ए आर रहमान यांनी चित्रपटाला संगीत दिले आहे. हा चित्रपट येत्या वर्षात प्रजासत्ताक दिनाच्या मुहूर्तावर म्हणजेच २६ जानेवारी २०२३ रोजी प्रदर्शित होणार आहे.
Discussion about this post