हॅलो बॉलिवूड ऑनलाईन। गेल्या काही दिवसांपासून हॅकिंगच्या प्रकरणांची वाढ झाली आहे. रोज येणाऱ्या तक्रारी पाहता सायबर क्राईमचे प्रमाण वाढत असल्याचे स्पष्ट दिसून येत आहे. हि बाब अतिशय धोकादायक आणि चिंताजनक आहे. अलीकडेच अभिनेता प्रवीण तरडे यांचे सोशल मीडिया हॅण्डल हॅक झाल्याची माहिती मिळाली होती. यानंतर आता ‘चला हवा येऊ द्या’ फेम अभिनेता अंकुर वाढवे याचेही सोशल मीडिया हॅण्डल फेसबुक अकाउंट हॅक झाल्याची तक्रार त्यानं सायबर पोलिसांत दाखल केली आहे. त्याच्या अकाऊंटवरून काही अश्लील गोष्टी पोस्ट केल्याचे त्याच्या लक्षात येताच त्याने थेट सायबर सेलमध्ये तक्रार दाखल करून इंस्टाग्रामवर चाहत्यांना माहिती दिली आहे.
अभिनेता अंकुरने त्याच्या अधिकृत सोशल मीडिया इंस्टाग्राम हँडलवर सायबर पोलिसांत दाखल केलेल्या तक्रारीची प्रत शेअर केली आहे. सोबतच त्याने कॅप्शनमध्ये लिहिले आहे कि, ‘मित्रांनो माझे फेसबुकचे पेज काही दिवसांपासून हॅक झालेले आहे. त्यावर जे पोस्ट होतंय त्याच्याशी माझा काहीही संबंध नाही. बऱ्याच मित्रांनी मला कॉल व मेसेज करून याबद्दल माहिती देवून चिंता व्यक्त केली. तदसंबंधी मी आजच सायबरला तक्रार दाखल केलीय काळजी नसावी आणि असच पाठीशी उभे रहा धन्यवाद!’ सोबतच सतर्क रहा माझ्या या पेजवरून काहीही मेसेज आला तर दुर्लक्षित करा नशिबाने अजून तसे कोणाला मेसेज नाही आले. ही महिती माझ्या व तुमच्याही मित्रांपर्यंत पोहचवा’.
मिळालेल्या माहितीनुसार, अभिनेता अंकुर वाढवेचे फेसबुक अकाऊंट हे दिनांक २४ डिसेंबर २०२२ रोजी हॅक झाले आहे. या प्रकरणात अंकुरची बदनामी केली जात असल्याचे समोर आले आहे. तसेच आपले फेसबुक अकाऊंट कोणी व का हॅक केलं..? तसेच हॅकरचे लोकेशन काय आहे..? याबाबतची माहिती आपल्याला लवकरात लवकर देण्याची विनंती अंकुरने सायबर पोलिसांना केली आहे. अंकुरच्या वर्कफ्रंटबद्दल बोलायचं तर, सध्या तो ‘चला हवा येऊ द्या’ या कॉमिक शोमध्ये काम करत आहे. सोबतच ‘वासूची सासू’ या नाटकातही तो काम करतो आहे.
Discussion about this post