हॅलो बॉलिवूड ऑनलाईन। कलर्स हिंदीचा लोकप्रिय शो ‘बिग बॉस 15’ची विजेती आणि ‘नागिन 6’ फेम अभिनेत्री तेजस्वी प्रकाशने मराठी सिनेसृष्टीत पदार्पण केले आहे. छोट्या पडद्यावरील तेजस्वी आता मराठी सिने इंडस्ट्रीच्या माध्यमातून मोठ्या पडद्यावर झळकण्यास सज्ज झाली आहे. आपल्या तेजस्वी, सुंदर आणि लक्षवेधी सौंदर्यासह, अभिनयासाठीदेखील ती प्रसिद्ध आहे. यानंतर आता ‘मन कस्तूरी रे’ या मराठी चित्रपटातून ती चित्रपटविश्वात पहिले पाऊल टाकत आहे. या चित्रपटातील तिचा फर्स्ट लूक रिलीज झाला आहे आणि सोशल मीडियावर याला चांगलीच पसंती मिळत आहे.
अभिनेत्री तेजस्वी प्रकाशने तिच्या अधिकृत सोशल मीडिया इंस्टाग्राम हँडलवर हा फर्स्ट लूक शेअर केला आहे. ज्यामध्ये तेजस्वी झोपेतून उठताना दिसते आणि नंतर गोड स्माईल करते. यासोबत तिने कॅप्शनमध्ये लिहिले आहे कि,
‘ती…पहाटे पडलेलं गोड स्वप्न
ती…सांजवेळी बहरलेल्या मोगऱ्याचा सुगंध
तिच्या सोबतीचे क्षण हवेहवेसे
तिला पाहता मन कस्तुरी रे!’ मराठी चित्रपटसृष्टीत पदार्पण करतोय एक गोड हसरा चेहरा … ‘श्रुती’ च्या भूमिकेत.. तेजस्वी प्रकाश. तेजस्विनीचा हा लूक अत्यंत गोड आणि लडिवाळ आहे. तिचे चाहते या लूकवर प्रचंड फिदा झाले आहेत.
या चित्रपटात तेजस्वि प्रकाश गोड, चुळबुली आणि तितकीच रॉकिंग अशा ‘श्रुती’चे पात्र साकारत आहे. नितीन केणी यांच्या ‘मुंबई मुव्ही स्टुडिओ’ची प्रस्तुत ‘मन कस्तुरी रे’ हा चित्रपट येत्या ४ नोव्हेंबर २०२२ रोजी प्रेक्षकांच्या भेटीला येणार आहे. या चित्रपटात तेजस्वी सोबत अभिनेता अभिनय बेर्डे स्क्रीन शेअर करतो आहे. त्यांची ‘लव्हेबल केमिस्ट्री’ पहायला सगळेच आतुर झाले आहेत. या चित्रपटाचे लेखन, दिग्दर्शन संकेत माने यांचे आहे. तर इमेन्स डायमेन्शन एंटरटेन्मेंट आर्टस प्रोड्क्शन, वेंकट अत्तीली आणि मृत्युंजय किचंबरे यांची निर्मीती आहे. तसेच निशिता केणी आणि करण कोंडे यांच्या ड्रगन वॉटर फिल्म्सने या चित्रपटाची सहनिर्मीती केली आहे.
Discussion about this post