हॅलो बॉलिवूड ऑनलाईन। सोनी मराठी वाहिनीवरील अत्यंत लोकप्रिय कॉमिक शो ‘महाराष्ट्राची हास्यजत्रा’ने प्रेक्षकांना अक्षरशः वेड लावले आहे. या कार्यक्रमाच्या माध्यमातून एकापेक्षा एक खतरनाक कलाकार मंडळी मनोरंजन विश्वाला मिळाली आहेत. यांपैकी एक इरसाल नमुना अर्थात हास्यवीर गौरव मोरे. फिल्टर पाड्याचा बच्चन अशी त्याची एक खास ओळख आहे. गौऱ्याचं स्किट त्याच्या अपमानाशिवाय पूर्ण कुठे होत. गौऱ्या या स्किटच्या माध्यमातून नेहमीच प्रेक्षकांना खळखळून हसवत असतो आणि म्हणून तो सगळ्या प्रेक्षकांचा लाडका आहे. पण आता गौऱ्याच्या चाहत्यांसाठी एक वाईट बातमी आहे. माहितीनुसार, पुढचे काही दिवस गौरव आपल्याला हास्यजत्रेत दिसणार नाही. याचे कारण म्हणजे गौरवने हास्य जत्रेतून ब्रेक घेतला आहे.
अभिनेता गौरव मोरे हा सोशल मीडियावर प्रचंड सक्रीय असतो. त्यामूळे तो नेहमीच चाहत्यांच्या संपर्कात राहण्यासाठी विविध पोस्ट शेअर करतो. इतकेच काय तर त्याच्या कामासंदर्भातील विविध अपडेट सोशल मीडियाच्या माध्यमातून तो चाहत्यांना देत असतो. नुकतच गौरवने अधिकृत सोशल मिडिया हॅण्डल इंस्टाग्रामवर एक स्टोरी शेअर केली आहे. ज्यामध्ये गौरव मुंबई विमानतळावर दिसतोय. यामध्ये गौरवने आपण लंडनला जात असल्याचे म्हंटले आहे. माहितीनुसार, गौरव मोरेची ही दुसरी लंडनवारी आहे. याआधी तो एका चित्रपटाच्या चित्रीकरणासाठी भरत जाधव यांच्यासोबत परदेशात गेला होता.
पण यावेळी अभिनेता गौरव मोरे नेमका कशासाठी लंडनला गेला आहे हे त्याने सांगितलेलं नाही. शिवाय याबद्दल कोणतीही अधिकृत वा ठोस माहिती मिळालेली नाही. पण असा अंदाज लावला जातोय की यावेळी गौऱ्या पुन्हा एकदा नव्या प्रोजेक्टच्या निमित्ताने लंडनला गेला आहे. जेव्हा भरत जाधव यांच्यासोबत गौरव पहिल्यांदा लंडनला गेला होता तेव्हा त्याने आपल्या भावना सोशल मीडियावर शेअर केल्या होत्या. शिवाय त्याने शेयर केलेले बाबासाहेब आंबेडकर यांच्या घराचे फोटो चांगलेच व्हायरल झाले होते. आता तो पुन्हा लंडनमध्ये का गेला आहे याबाबत अजून उत्सुकता तशीच आहे. लवकरच या दौऱ्याची माहिती आणि फोटो गौरव शेअर करेल अशी आशा आहे.
Discussion about this post