हॅलो बॉलिवूड ऑनलाईन। झी स्टुडिओज आणि दिग्दर्शक परेश मोकाशी हे एक समीकरणच आहे. या दोघांनी एकत्र येऊन केलेली कलाकृती ही नेहमीच अफलातून असते. असाच एक जबरदस्त विषय घेऊन पुन्हा एकदा झी स्टुडिओज आणि दिग्दर्शक परेश मोकाशी प्रेक्षकांच्या भेटीला येण्यास सज्ज झाले आहेत. ‘दिसतं तसं नसतं’ अशी टॅगलाईन असलेल्या ‘वाळवी’ या चित्रपटाचे पोस्टर आणि टिझर रिलीज झाल्यापासून हा चित्रपट चर्चेत आला आहे. यानंतर आता चर्चा रंगली आहे ती या चित्रपटातील सुबोध भावेंच्या भूमिकेची. नुकतेच त्याच्या भूमिकेचे पोस्टर रिलीज झाले आहे.
‘वाळवी’ हा चित्रपट शीर्षकानेच आपले वेगळेपण सिद्ध करतो आहे. येत्या वर्षात १३ जानेवारी २०२३ रोजी हा चित्रपट सर्वत्र सिनेमागृहात प्रदर्शित होणार आहे. या चित्रपटामध्ये दिग्दर्शक परेश मोकाशी यांनी प्रत्येक कलाकाराची व्यक्तिरेखा ही त्याच्या सिनेसृष्टीतील ‘इमेज’पेक्षा वेगळी समोर आणली आहे. हि बाब नुकतेच रिलीज झालेले सुबोध भावेंच्या पात्राचे पोस्टर अगदी सिद्ध करत आहे.
या पोस्टरमध्ये सुबोधच्या एका हातात अगरबत्त्या दिसत आहेत. तर दुसऱ्या हातात वेफर. कुणीही हे पोस्टर पाहिल्यावर पहिलं म्हणेल., अरे हा काय विचित्रपणा आहे..? या पोस्टरवरून सुबोधने साकारलेल्या भूमिकेचा अंदाज लावणे फारच कठीण आहे. म्हणूनच तर चित्रपटाची टॅगलाईन अशी आहे कि, ‘दिसतं तसं नसतं’.
अभिनेता सुबोध भावे त्याच्या अधिकृत सोशल मीडिया हँडलवर हे पोस्टर शेअर करत लिहिले आहे कि, ‘ हातात अगरबत्ती आणि वेफर? सुबोध भावे नक्की करतोय तरी काय? गुढ उलगडेल थेट नव्या वर्षात. ‘वाळवी’ १३ जानेवारी २०२३ पासून सर्वत्र प्रदर्शित.’ या चित्रपटात आता सुबोध भावेशिवाय स्वप्नील जोशी, अनिता दाते, सुबोध भावे, शिवानी सुर्वे हे कलाकार देखील महत्वाच्या भूमिकेत आहेत. पण नेमक्या कोणत्या भूमिकेत दिसणार आहेत हे अद्याप समोर आलेले नाही. आता हळूहळू प्रत्येक भूमिकेवरून पडदा उघड होईल. पण ही ‘वाळवी’ नेमकी कशाला लागली आहे.? हे जाणून घेण्यासाठी १३ जानेवारीला चित्रपट गृहातच जावे लागेल.
Discussion about this post