हॅलो बॉलिवूड ऑनलाईन। मराठी सिनेसृष्टीत सोनाली कुलकर्णी, संतोष जुवेकर आणि हेमंत ढोमे या तिन्ही कलाकारांची आपापली अशी वेगळी ओळख आहे. तिघांचाही स्वतःचा प्रचंड मोठा चाहता वर्ग आहे. असे असताना हे तीन कलाकार जर एकत्र स्क्रीन शेअर करत असतील तर..? हि केवळ शक्यता नाहीये तर हे खरोखर घडलंय. होय. सोनाली कुलकर्णी, संतोष जुवेकर आणि हेमंत ढोमे यांचा नवा चित्रपट ‘डेट भेट’ येत्या फेब्रुवारी महिन्यात आपल्या भेटीला येत आहे. अमेय विनोद खोपकर एंटरटेनमेंट आणि झाबवा एंटरटेनमेंट प्रायव्हेट लिमिटेड प्रस्तुत या चित्रपटाचे पोस्टर नुकतेच सोशल मीडियावर रिलीज करण्यात आले आहे. हे पोस्टर चांगलेच चर्चेत आले आहे.
अमेय विनोद खोपकर एंटरटेनमेंट आणि झाबवा एंटरटेनमेंट प्रायव्हेट लिमिटेड प्रस्तुत ‘डेट भेट’ या आगामी मराठी चित्रपटाचे पोस्टर सोशल मीडियावर शेअर करण्यात आले. यामध्ये सोनाली कुलकर्णी, हेमंत ढोमे आणि संतोष जुवेकर हे मुख्य भूमिकेत दिसणार असून हा चित्रपट येत्या २४ फेब्रुवारी २०२२ रोजी प्रदर्शित होत आहे. या चित्रपटाची कथा आणि दिग्दर्शनाची धुरा लोकेश विजय गुप्ते यांनी सांभाळली आहे. पटकथा आणि संवाद अश्विनी शेंडे यांचे आहेत. तर चित्रपटाची निर्मिती शिवांशु पांडे, हितेश रुपारेलिया आणि स्वाती खोपकर यांनी केली आहे.
‘डेट भेट’ या चित्रपटाची सह निर्मिती निनाद नंदकुमार बत्तीन, तबरेझ पटेल, प्रशांत जम्मूवाला, हनी शर्मा यांनी केली आहे. तसेच असोसिएट निर्माते अजय सोनी आणि प्रशांत शेळके आहेत. चित्रपटाचे सिनेमॅटोग्राफर प्रदीप खानविलकर आहेत आणि चित्रपटाचे संगीत ‘व्हिडिओ पॅलेस’ या म्युझिक लेबल द्वारे प्रदर्शित होत आहे. या चित्रपटाचे मोशन पोस्टर सोनाली, संतोष आणि हेमंत या तिघांनीही सोशल मीडियावर शेअर केले आहे. सोबत कॅप्शनमध्ये लिहिले आहे कि, ‘प्रेमाच्या महिन्यात आता होणार ‘डेट भेट’ …सादर आहे ‘डेट भेट’ चित्रपटाचे पहिले वहिले पोस्टर.. २४ फेब्रुवारी पासून तुमच्या जवळच्या सिनेमागृहात …’ हा नवा ट्रायो पाहून प्रेक्षकांचीही उत्सुकता वाढली आहे. लवकरच या चित्रपटाचा ट्रेलर रिलीज होणार आहे.
Discussion about this post