हॅलो बॉलिवूड ऑनलाईन। अभिनेता अजय देवगणचा ‘दृश्यम 2’ हा चित्रपट नुकताच प्रदर्शित झाला असून त्याला प्रेक्षक उत्तम प्रतिसाद देत आहेत. असाहतक हात सोशल मिडीयावर अजयच्या आगामी नव्या चित्रपटाची जोरदार चर्चा रंगली आहे. हा चित्रपट आहे बहुप्रतीक्षित ‘भोला’. नुकताच ‘भोला’ या आगामी चित्रपटाचा दमदार टीझर प्रदर्शित झाला आहे. या चित्रपटाचे दिग्दर्शन खुद्द अजय देवगणचे असून यातील मध्यवर्ती भूमिकेत तो स्वतः आहे. माहितीनुसार, २०१९ मध्ये प्रदर्शित झालेल्या ‘कैथी’ या तमिळ सुपरहिट चित्रपटाचा हा हिंदी रिमेक आहे.
या चित्रपटात अजय देवगणसोबत अभिनेत्री तब्बूदेखील महत्वपूर्ण भूमिकेत दिसणार आहे. सोशल मिडीयावर रिलीज झालेल्या या टीझरच्या सुरुवातीला अनाथ आश्रमातील एक महिला ज्योती नावाच्या लहान मुलीला शोधत असते. हि महिला ज्योतीला सांगते कि, दुसऱ्या दिवशी तिला कोणीतरी भेटायला येणार आहे. यानंतर ज्योती नातेवाईक मोजत असते. आई-बाबा, आजी-आजोबा यांच्याशिवाय अजून कोण नातेवाईक असतं, असा प्रश्न तिला पडतो. यापुढे टीझरमध्ये अजयची एक झलक पहायला मिळते.
तुरुंगात भगवदगीता वाचत असलेल्या एका कैदीला आता बाहेर जायची वेळ आली आहे, असे सांगितले जाते. हा कैदी दुसरा-तिसरा कोणी नसून अजय आहे. मुख्य म्हणजे तो कुठून आलाय..? तो कोण आहे..? हे कोणालाच माहीत नाही. पण ज्यांना माहीत झालं ते काही जिवंत राहिले नाहीत, असे दुसरा कैदी त्याच्याविषयी बोलताना दिसतो.
तो जेव्हा कपाळावर भस्म लावतो, तेव्हा लोकांना भस्मसात करतो, असाही एक संवाद या टीझरच्या अखेरीस ऐकायला मिळतो. यामध्ये अजय देवगणचे अनेक जबरदस्त ॲक्शन सीन आहेत आणि यासाठी त्याच्या हातात त्रिशूल पहायला मिळतं. भगवदगीता, भस्म आणि त्रिशूल या टीझरमधल्या विशिष्ट गोष्टींनी अजयच्या भूमिकेसह चित्रपटाबाबत विशेष उत्सुकता निर्माण केली आहे.
Discussion about this post