हॅलो बॉलिवूड ऑनलाईन। अभिनेता रितेश देशमुख याच्या ‘वेड’ चित्रपटाचा टिझर नुकताच प्रदर्शित झाला आहे. यामध्ये रितेश देशमुख आणि त्याची पत्नी तसेच बॉलिवूड अभिनेत्री जिनिलिया देशमुख बऱ्याच वर्षांनी एकत्र काम करताना दिसणार आहेत. रितेशने त्याच्या इंस्टाग्राम हॅण्डलवर ‘वेड’चा टीझर शेअर केला आहे. जो नेटकऱ्यांना चांगलाच भावला आहे. हा चित्रपट येत्या ३० डिसेंबर २०२२ रोजी प्रदर्शित होतोय.
‘वेड’ चित्रपटाचा टीझर शेअर करताना रितेश देशमुखने कॅप्शनमध्ये लिहिलं आहे कि, ‘एका नव्या प्रवासाची सुरवात करतो आहे. माझं दिग्दर्शनातलं पहिलं पाऊल….मनात थोडी आतुरता ..थोडी भीती …पण प्रचंड वेड…. आशा आहे आपल्याला आवडेल… आशिर्वाद आणि प्रेम असू द्या.’ हा टिझर पाहून चाहत्यांमध्ये चित्रपटाबाबत मोठी उत्सुक्ता निर्माण झाली आहे. मुख्य म्हणजे या चित्रपटात रितेश आणि जिनिलिया तब्बल १० वर्षांनंतर मोठ्या पडद्यावर एकत्र दिसणार आहेत. त्यामुळे हि लाडकी जोडी पुन्हा एकदा एकत्र पाहण्यासाठी त्यांचे चाहते आतुर झाले आहेत.
माहितीनुसार, या चित्रपटाची कथा प्रेमावर आधारित आहे. पण अपूर्ण प्रेमावर. या चित्रपटाच्या टीझरमध्ये रितेश देशमुख सांगतोय कि, ‘प्रेम असं समुद्रासारखं. कोणाच्या नशिबी लाठ, तर कोणाच्या नशिबी काठ.’ याच लक्षवेधी संवादाने टिझरची सुरुवात होते. पुढे रितेश सांगतोय कि, ‘प्रेम मिळते तेव्हा आनंद मिळतो, पण प्रेम अपूर्ण राहिल्यावर विरह मिळतो’. शिवाय या टिझरमध्ये ‘वेड तुझा विरह वणवा…’ हे गाणदेखील ऐकायला मिळतंय. या चित्रपटातून जिनिलिया मराठी सिनेसृष्टीत पदार्पण करते आहे. त्यामुळे हा चित्रपट रितेश आणि जिनिलिया दोघांसाठी अत्यंत महत्वाचा आहे.
Discussion about this post