हॅलो बॉलिवूड ऑनलाईन। मराठी सिनेसृष्टीतील चमचमता तारा लोकप्रिय अभिनेता, उत्तम दिग्दर्शक, समाज भान बाळगणारा लेखक प्रसाद ओक दिवसेंदिवस प्रगतीची एक एक पायरी चढताना दिसत आहे. अलीकडेच प्रसाद ओकचा वाढदिवस झाला आणि या निमित्त त्याचे चाहते, मित्र मंडळी, नातेवाईक आणि इंडस्ट्रीतील अनेक कलाकार मंडळी यांनी त्याच्यावर शुभेच्छांचा वर्षाव केला आहे. यानिमित्त त्याचा खास मित्र आणि मराठी इंडस्ट्रीतील नामवंत दिग्दर्शक विजू माने याने एक पोस्ट शेअर केली आहे. ज्यामध्ये आगामी काळात प्रसाद स्वातंत्र्यवीर सावरकरांची भूमिका साकारेल असे संकेत देण्यात आले आहेत.
अभिनेता प्रसाद ओकसाठी दिग्दर्शक विजू माने यांनी वाढदिवसाच्या शुभेच्छा देण्यासाठी हि पोस्ट शेअर केली होती. या पोस्टमध्ये विजू माने यांनी शेअर केलेल्या फोटोमध्ये ते स्वतः आणि प्रसाद ओक एकत्र दिसत होते. यावेळी प्रसादच्या हातामध्ये स्वातंत्र्यवीर सावरकर यांचा फोटो असलेले एक सीडी कव्हर अगदी स्पष्ट दिसत आहे. हा फोटो शेअर करताना विजू माने यांनी एक कॅप्शन लिहिले आहे. जे वाचून लवकरच प्रसाद ओक सावरकरांच्या भूमिकेत दिसण्याची शक्यता आहे असा अंदाज वर्तविणे फारच साहजिक आहे.
या फोटोसह विजू माने यांनी कॅप्शनमध्ये लिहिले आहे कि. ‘तुझ्या हातात असलेल्या सीडी कव्हरवर जो फोटो आहे तो रोल तू करणार आणि तो सिनेमा मी दिग्दर्शित करणार हे विधीलिखित लवकरच प्रत्यक्षात येवो ह्याच वाढदिवसाच्या शुभेच्छा. (त्याआधी एक जोरदार मॅच प्रॅक्टिस होईलच)’. विजू माने यांची हि पोस्ट या कॅप्शनमुळे सोशल मीडियावर प्रचंड चर्चेत आली आहे. या कॅप्शननुसार येत्या काळात विजू माने दिग्दर्शित स्वातंत्र्यवीर सावरकर यांच्या बायोपिकमध्ये त्यांची भूमिके अभिनेता प्रसाद ओक साकारणार आहे अशी चर्चा सुरु झाली आहे. तसे या पोस्टमधून विजू माने यांनी कोणत्याही चित्रपटाची अधिकृत घोषणा केलेली नाही. मात्र याला संकेत म्हणता येणार नाही असे नाही.
Discussion about this post