हॅलो बॉलिवूड ऑनलाईन| कलर्स मराठी वाहिनीवरील लोकप्रिय मालिका ‘ भाग्य दिले तू मला ‘ सध्या अतिशय आनंदी वळणावर येऊन ठेपली आहे. खूप अडचणी आणि परीक्षा दिल्यानंतर अखेर या मालिकेतील मुख्य पात्र राजवर्धन आणि कावेरी यांचा मिलाप होतो आहे. या २६ फेब्रुवारी २०२३ रोजी, रविवारी राजवर्धन आणि कावेरी यांच्या लग्नाचा शुभ मुहूर्त काढण्यात आला आहे. त्यामुळे राज आणि कावेरीच्या लग्नाचा बार याच महिन्यात एकदम दणक्यात उडणार आहे. ज्याचा आनंद मालिकेच्या प्रेक्षकांमध्येही दिसून येत आहे. लग्नाचे खास आमंत्रण देणारा एक व्हिडिओ सोशल मीडियावर व्हायरल होत आहे.
भाग्य दिले तू मला या मालिकेचा एक प्रोमो व्हिडिओ सोशल मीडियावर व्हायरल होत आहे. कलर्स मराठीच्या अधिकृत सोशल मीडिया हॅण्डल इंस्टाग्रामवर हा व्हिडिओ शेअर करण्यात आला आहे. ज्यामध्ये राजवर्धन आणि कावेरी दोघे मिळून आपल्या लग्नाची पत्रिका देवासमोर ठेवताना दिसत आहेत. देवाचा आणि राजवर्धनच्या आई रत्नमाला यांचा आशीर्वाद घेऊन दोघेही आपल्यावर प्रचंड प्रेम करणाऱ्या प्रेक्षकांना आपल्या लग्नाचे खास आमंत्रण देताना दिसत आहेत. दिनांक २० फेब्रुवारी २०२३ ते २६ फेब्रुवारी २०२३ असा राजवर्धन आणि कावेरीचा लग्न सोहळा सप्ताह आपल्याला पहायला मिळणार आहे.
राजवर्धन आणि कावेरी यांनी एकमेकांवर असणारे प्रेम व्यक्त केल्यानंतर ते मिळवणे मात्र एक संघर्ष ठरला. राजवर्धनने अक्षरशः प्रेमाची एक अनोखी परीक्षा दिली आणि तो या कसोटीवर खरा उतरला तेव्हा त्याला त्याची कावेरी मिळाली. यानंतर आता अखेर तो क्षण आला आहे जेव्हा राजवर्धन आणि कावेरी आपल्या वैवाहिक आयुष्याकडे वाटचाल करत आहेत. या आनंदात प्रेक्षकांचा मोठा वाटा असून हा संपूर्ण सप्ताह मालिकेतील कलाकार तसेच मालिकेच्या प्रेक्षकांसाठी धमाल, मजा आणि खूप सारे ट्विस्ट घेऊन येणारा ठरणार आहे.
Discussion about this post