हॅलो बॉलिवूड ऑनलाईन। मराठी मनोरंजन सृष्टीच्या प्रेमात असणाऱ्या प्रत्येक चाहत्यांसाठी नवरात्रीच्या शुभ मुहूर्तावर एक गोड सरप्राईज रिलीज करण्यात आले आहे. मुंबई मुव्हिस स्टुडिओज प्रस्तुत ‘मन कस्तुरी रे’ या आगामी रोमँटिक मराठी चित्रपटाचे रोमँटिक असे नवे पोस्टर सोशल मीडियावर प्रदर्शित करण्यात आले आहे. नवरात्रीच्या निमित्ताने हे पोस्टर रिलीज करण्यात आले असून यात अभिनेत्री तेजस्वी प्रकाश आणि अभिनेता अभिनय बेर्डे एकमेकांच्या प्रेमाच्या रंगात बुडालेले आपण पाहू शकता. या दोघांच्याही चाहत्यांनी या पोस्टरला उत्तम प्रतिसाद दिलेला आहे.
अभिनेता अभिनय बेर्डे आणि अभिनेत्री तेजस्वी प्रकाश या दोघांनीही आपल्या अधिकृत सोशल मीडिया हँडलवर आपल्या आगामी चित्रपटाचे हे नवे पोस्टर शेअर केले आहे. या पोस्टरमध्ये अभिनय आणि तेजस्वी दोघेही रोमँटिक अंदाजात दिसत आहेत. हे पोस्टर शेअर करताना कॅप्शनमध्ये लिहिले आहे कि, ‘प्रेमाच्या आकाशात सोनेरी स्वप्ने सजविणाऱ्या दोन मनांची गोष्ट..! सादर आहे अभिनय बेर्डे आणि तेजस्वी प्रकाश यांच्या ‘मन कस्तुरी रे’ सिनेमाचं रोमँटिक पोस्टर…! सर्वांना नवरात्रीच्या हार्दिक शुभेच्छा.’
संकेत माने दिग्दर्शित ‘मन कस्तुरी रे’ हा चित्रपट येत्या ४ नोव्हेंबर २०२२ रोजी सर्वत्र चित्रपट गृहात प्रेक्षकांच्या भेटीला येणार आहे. बिग बॉस हिंदी आणि नागिण मालिका फेम अभिनेत्री तेजस्वी प्रकाशने ‘मन कस्तुरी रे’ या मराठी चित्रपटातून मराठी सिनेसृष्टीत पदार्पण केले आहे. त्यामुळे या चित्रपटासाठी ती फारच उत्सुक आहे. यामुळे तेजस्वीने सोशल मीडियावर नवरात्रीच्या शुभेच्छा देत या पोस्टरबाबत खूप उत्सुक असल्याचे सांगितले आहे. तिचा हा व्हिडिओ सोशल मीडियावर व्हायरल होतो आहे. या पोस्टरमधली तेजस्वी आणि अभिनयची केमिस्ट्री प्रेक्षकांना ओढून घेते आहे.
Discussion about this post