हॅलो बॉलिवूड ऑनलाईन। झी मराठी या मराठी वाहिनीवरील किचन रिऍलिटी शो ‘किचन कल्लाकार’ हा प्रत्येक घराघरात पाहिला जाणारा लोकप्रिय कार्यक्रम आहे. आतापर्यंत या कार्यक्रमात विविध क्षेत्रातील मंडळी येऊन गेली आहेत. यामध्ये अनेक कलाकार, नेते मंडळी यांचा सहभाग आहे. आतापर्यंत प्रेक्षकांनी विविध किस्से, अनुभव ऐकले अनुभवले आणि मजा केली.
यानंतर आता किचन कल्लाकारच्या आगामी भागात चक्क कवी मनाचे नेते आले आहेत. अर्थात रिपाइचे अध्यक्ष रामदास आठवले किचन कल्लाकार मध्ये आले आहेत. त्यामुळे हा एपिसोड फारच अल्लग लेव्हलचा आहे.
आपल्या मिश्किल कवितांमुळे नेहमीच चर्चेत असणारे रामदास आठवले हे आपल्या पत्नीसह या कार्यक्रमात सहभागी झाले आहेत. या भागाचा एक प्रोमो व्हिडीओ नुकताच समोर आलाय. या व्हिडीओत रामदास आठवले हे आपल्या पत्नीसह दिसत आहेत. या भागात त्यांच्यासोबत प्रसिद्ध कवी अशोक नायगावकर आणि बोलक्या बाहुल्यांचा खेळ करणारे रामदास पाध्येदेखील सहभागी झाल्याचे दिसत आहेत. रामदास आठवले यांनी यावेळी भारी मज्जा येईल अशा कवितांचे सादरीकरण केले आहे.
यामध्ये रामदास आठवले आपल्या पत्नीला कामात मदत करत असल्याचे म्हणाले. सोबत “घरात भाजी आणायचं काम माझेच आहे सांगताना ‘मी आणतो भाजी कारण मला लागते ताजी’, असेही रामदास आठवले म्हणाले आणि हशा पिकला.
विशेष म्हणजे या कार्यक्रमातील शेठ हे पात्रसुद्धा त्यांची अनोखी ओळख करुन देताना दिसत आहे. रामदास आठवले हे जगातले सर्वात मोठे ज्योतिषी आहेत असे शेठ सांगतो. दरवेळी पाच वर्षांनी कोणाचं सरकार येणार हे रामदास आठवलेंना बरोबर कळत असंही शेठ सांगतो.
याशिवाय म्हणी ओळखण्याच्या खेळात ते एक म्हण अभिनयाने सांगण्याचा प्रयत्न करत असतात पण त्यांच्या पत्नीला काही ओळखता येत नाही. मग म्हण सांगताना ते म्हणतात कि, ‘मनी नाही भाव, देवा मला पाव आणि सांगली माझं गाव.’ अशीच मजा पूर्ण भागात येणार आहे त्यामुळे हा भाग पहायला विसरू नका.
Discussion about this post