हॅलो बॉलिवूड ऑनलाईन। मराठीसह बॉलिवूड इंडस्ट्रीलाही आपल्या सौंदर्याने आणि अभिनयाने वेड लावणारी मराठमोळी बोल्ड, ब्युटीफुल अभिनेत्री सई ताम्हणकर आघाडीच्या अभिनेत्रींपैकी एक अभिनेत्री आहे. गेल्या काही काळात तिने बॉलिवूड सिने इंडस्ट्रीत लहान मात्र अत्यंत महत्वपूर्ण भूमिका साकारून स्वतःचे असे एक वेगळे स्थान निर्माण केले आहे. सध्या तिच्या ‘इंडिया लॉकडाउन’ या चित्रपटाची जोरदार चर्चा आहे. त्यामधील भूमिकेवरून तिचे चाहते नाराज झाले होते. हा चित्रपट लोकडाऊन दरम्यान घडलेल्या घटनांवर आधारित आहे. याच्या चित्रीकरणा दरम्यानचा एक फोटो शेयर करत सईने एक खास पोस्ट शेअर केली आहे.
मराठी अभिनेत्री सई ताम्हणकरने अधिकृत सोशल मीडिया हॅण्डल इंस्टाग्रामवर तिचा एक फोटो शेयर केला आहे. हा फोटो तिच्या ‘इंडिया लॉ़कडाऊन’ या आगामी चित्रपटाच्या चित्रीकरणाचे दरम्यानचा आहे. या फोटोमध्ये सई एका हातगाडीवर झोपलेली दिसत आहे. तोंडावर छोटा नॅपकिन टाकून तिने झोपेतच एका हाताने काळ्या रंगाची छत्री पकडली असल्याचे यात दिसत आहे. तर आजूबाजूला चित्रीकरण सुरू असल्याचे दिसत आहे. या फोटोसोबत सईने एक कॅप्शन देत तिला आलेला अनुभव शेअर केला आहे.
या कॅप्शनमध्ये सईने लिहिले आहे कि, ‘जेव्हा आम्ही चित्रपटाच्या सेटपासून खूप दूरच्या ठिकाणी शूटिंग करत असतो, तेव्हा असं परिस्थितीशी जुळवून घेत काम करतो. हीच जुळवून घेण्याची वृत्ती टाळेबंदीच्या काळामध्ये आपल्या कामी आली’. सईचा हा फोटो सोशल मीडियावर चांगलाच व्हायरल होत आहे.
मधुर भंडारकर यांनी ‘इंडिया लॉकडाऊन’ या चित्रपटाचे दिग्दर्शन केले आहे आणि या चित्रपटात सई एका मजूराच्या पत्नीची भूमिका साकारतेय. यात अभिनेता प्रतीक बब्बर तिच्या पतीच्या भूमिकेत दिसणार आहे. सई, प्रतीकसह श्वेता बासु प्रसाद, आहाना कुमरा आणि प्रकाश बेलवाडीदेखील या चित्रपटात महत्वाच्या भूमिकेत आहेत. आगामी काळात लवकरच सई बॉलिवूड अभिनेता इम्रान हाशमी सोबत ‘ग्राउंड झिरो’ या चित्रपटातदेखील झळकणार आहे.
Discussion about this post