हॅलो बॉलिवूड ऑनलाईन। मराठी अभिनेता संतोष जुवेकर हा सोशल मीडियावर प्रचंड सक्रिय असतो. त्यामुळे अनेकदा विविध पोस्ट शेअर करत तो नेटकऱ्यांचे लक्ष वेधून घेताना दिसतो. सोशल मीडियावर त्याचे फॉलोवर्सही बरेच आहेत आणि यामुळे त्याच्या पोस्ट नेहमीच चर्चेत असतात. आताही त्याने एक भन्नाट मजेशीर अशी पोस्ट शेअर केली आहे. ज्यामध्ये त्याने एक फोटो शेअर केला आहे. या फोटोत हॉलिवूड सिनेविश्वातील लोकप्रिय अभिनेता टॉम क्रूजसारखे दिसणारे तिघे जण दिसत आहेत. हा फोटो अभिनेता टॉम क्रूझला टॅग करत त्याने भन्नाट कॅप्शन लिहिलं आहे.
या फोटोसोबत संतोष जुवेकरने कॅप्शनमध्ये लिहिले आहे कि, ‘जर हा फोटो खरा असेल तर असा सेम कुणी माझ्यासारखाच दिसणारा असेल तर मला फोटो पाठवा. एकाच वेळेला खूप कामं आली तर वाटून घेता येतील. खरंच पाठवा आणि मला टॅग करा. एकमेका सहाय्य करू अवघे मिळवू यश. ए टॉम्या तुलापण टॅग केलंय. तू पण पाठवू शकतोस बरं का तुझा फोटो. तुझ्या आधार कार्डवरील फोटो सारखाच दिसतो मी. काळजी करू नको, आपण सारखेच आहोत’. संतोषच्या या पोस्टवर नेटकरीसुद्धा मजेशीर कमेंट्स करताना दिसत आहेत.
अभिनेता संतोष जुवेकरने शेअर केलेला हा फोटो सोशल मीडियावर तुफान व्हायरल होत आहे. या फोटोतील तिघे जण खरोखरंच एकसारखे दिसत आहेत. महत्वाचं म्हणजे तिघेही टॉमसारखे हुबेहूब. त्यामुळे हा फोटो सोशल मीडियावर वेगवेगळ्या कॅप्शनने ट्रेंड होतोय. काही नेटकऱ्यांच्या मते हा फोटो आर्टिफिशिअल इंटेलिजेन्सने तयार केला आहे. तर काही म्हणत आहेत या फोटोतला एक खरा टॉम आहे आणि बाजूचे दोघे त्याचे बॉडी डबल आहेत. हा फोटो खरा कि खोटा हि वेगळी गोष्ट आहे. पण या फोटोने सोशल मीडियावर धमाल आणली आहे एव्हढं नक्की.
Discussion about this post