हॅलो बॉलिवूड ऑनलाईन। मराठी रंगभूमी, मालिका, जाहिरात आणि चित्रपट सृष्टीतून प्रेक्षकांचे भरभरून मनोरंजन करणारा अभिनेता सौरभ गोखले प्रत्येक भूमिकेत वेगळेपण देतो. त्याने साकारलेल्या प्रत्येक भूमिकेला स्वतःचे एक वेगळे आवरण असते, स्वतःची छटा असते. जी तंतोतंत साकारत भूमिकेला न्याय देण्याची कला सौरभमध्ये आहे. असाच प्रत्येक भूमिकेचा ढंग जपणारा अभिनेता सौरभ गोखले आता एका फौजीच्या स्वरूपात आपल्या भेटीस यायला सज्ज झाला आहे. होय. आगामी मराठी चित्रपट ‘फौजी’मध्ये तो जिगरबाज सैनिकाच्या भूमिकेत दिसणार आहे.
अलीकडेच त्याने आपल्या अधिकृत सोशल मीडिया हँडलवर फौजीच्या वेशातील फोटो शेअर केले आहेत. सोबत कॅप्शनमध्ये लिहिलं आहे कि, ‘आपली सुरक्षा सुनिश्चित करण्यासाठी आपला जीव धोक्यात घालणाऱ्या भारतीय सैन्याच्या शूर आत्म्यांना मी सलाम करतो. त्यांच्या समर्पण आणि सेवेमुळेच आम्हाला त्यांच्या प्रेरणादायी कथा चित्रपटाच्या माध्यमातून शेअर करण्याचा बहुमान मिळाला आहे’. सौरभने शेअर केलेला कमांडोच्या वेशातील लूक सोशल मीडियावर व्हायरल झाला आहे. मातृपितृ फिल्म्स् प्रस्तुत घनशाम येडे निर्मित आणि दिग्दर्शित ‘फौजी’ देशाचा प्राण, आन बान शान’ हा चित्रपट लवकरच प्रेक्षकांच्या भेटीला येत आहे.
सौरभने या भूमिकेबद्दल बोलताना म्हटले आहे कि, ‘फौजी’ सिनेमाच्या निमित्ताने मला सैनिकाची भूमिका साकारायला मिळाली असून त्यासाठी आवश्यक ते ट्रेनिंग सध्या मी घेत आहे. देशासाठी प्राण पणाने लढणाऱ्या सैनिकाची भूमिका साकारणं हे माझ्यातील अभिनेत्यासाठी आनंददायी तितकेच आव्हानात्मक आहे’. या चित्रपटात सौरभ गोखले सोबत प्राजक्ता गायकवाड, नागेश भोसले, शहाबाज खान, अरुण नलावडे, कल्याणी चौधरी, संजय खापरे, अश्विनी कासार, सुनील गोडबोले, हंसराज जगताप, सिद्धेश्वर झाडबुके, रोहित चव्हाण, विवेक चाबुकस्वार, जयंत सावरकर, सुहास गरगडे, विश्वजित बेलदार, संकेत तटकरी, घनशाम येडे हे कलाकार दिसणार आहेत.
Discussion about this post