हॅलो बॉलिवूड ऑनलाईन। लाल साडी, लाल बिंदी, हातात घड्याळ आणि टाळी.. असा लूक असणारा फोटो अभिनेत्री सुष्मिता सेनने सोशल मीडियावर शेअर केला होता. जो चांगलाच चर्चेत आला आणि समजलं कि हा लूक तिच्या आगामी ‘ताली’ या वेबसिरीजमधला आहे. यानंतर समोर आलं कि, सुष्मिता सेन श्री गौरी सावंत यांची भूमिका साकारते आहे. एक तृतीयपंथी असणे आणि जगणे हि काय भावना आहे हे सांगणारी हि गोष्ट आहे. आज गौरी यांचं नाव जगभरात पोहोचलं आहे. पण यासाठी त्यांनी जे झेललं ते शब्दात सांगता येणार नाही. म्हणून रवी जाधव यांनी ‘ताली’ वेबसिरीज बनविण्याचे योजले. ज्याचे लेखन क्षितिज पटवर्धन यांनी केले आहे. या वेब सिरीजविषयी आत्मीयतेने श्री गौरी यांनी व्यक्त होत सोशल मिडीआयवर पोस्ट केल्या आहेत. ज्या चर्चेत आहेत.
श्री गौरी सावंत यांनी सोशल मीडियावर एक खास पोस्ट शेअर केली आहे. हि पोस्ट त्यांनी त्यांची भूमिका साकारणाऱ्या अभिनेत्री सुष्मिता सेनसाठी केली आहे. हि पोस्ट शेअर करताना त्यांनी कॅप्शनमध्ये लिहिले आहे कि, ‘आम्ही मूळ बायकाच.. त्यात माझी भूमिका तू करणार म्हणजे दुग्धशर्करा योग.. हा माझ्या समाजाचा खूप मोठा सन्मान, तुझ्या धाडसाला त्रिवार सलाम..’. या पोस्टमध्ये गौरी यांनी सुष्मितासोबतच फोटो शेअर केला आहे. या पोस्टवर अनेक नेटकऱ्यांनी विविध कमेंट करीत आपल्या प्रतिक्रिया दिल्या आहेत. अनेकांनी यावर सुष्मिताला तिच्या या आगामी प्रोजेक्टसाठी शुभेच्छा दिल्या आहेत.
याशिवाय श्री गौरी सावंत यांनी ‘ताली’ वेब सीरिजच्या संपूर्ण टीमसोबत एक फोटो शेअर करत आणखी एक पोस्ट शेअर केली आहे. या पोस्टसाठी कॅप्शन देताना गौरी यांनी लिहिलंय कि, ‘कोण म्हणतं परिवार नाही.. दिवसेंदिवस तुमच्या सारख्या गोड माणसांची भर पडतच चाललीये.. समानतेच्या वाटेवर तुम्ही दिलेल्या प्रेमाची मी आयुष्यभर ऋणी राहीन.. आज हे लिहिताना डोळ्यांच्या कडा ओलावल्या, पण जेव्हा मी जगाचा निरोप घेईन तेव्हा तुमच्या डोळ्याचे अश्रू कोणी पुसू शकणार नाही.. देवाचे आभार.. नांदुया सौख्य भरे….’. गौरी यांची हि पोस्टदेखील प्रचंड चर्चेत आहे. याशिवाय सुष्मिताच्या ‘ताली’ या आगामी वेबसीरिजचे सर्वत्र कौतुक केले जात आहे आणि ती कधी प्रदर्शित होणार याबाबत सर्वानाच एक विशेष उत्सुकता आहे.
Discussion about this post