हॅलो बॉलिवूड ऑनलाईन। स्वराज्याच्या तिन्ही छत्रपतींचे छत्र हरवल्यानंतर पोरक्या झालेल्या मराठा साम्राज्याला आपले वैयक्तिक दुःख बाजूला ठेवून कर्तुत्वाने आधार देणाऱ्या रणमर्दिनी, रणरागिनी महाराणी ताराबाई राजाराम भोसले म्हणजे स्त्रीनेतृत्वाचे सर्वोत्कृष्ट उदाहरण होय. ज्यांच्या शौर्याचे गुणगान मुघलांसारख्या बलाढ्य शत्रुनेदेखील केले. एक पुत्री, सून, पत्नी, माता तसेच राजस्त्री या भूमिकांमध्ये त्यांनी आदर्श प्रस्थापित केले. अशा अष्टपैलू स्त्रीचे जीवनचरित्र दिग्दर्शक राहुल जनार्दन जाधव मोठ्या पडद्यावर घेऊन येत आहेत. डॉ. जयसिंगराव पवार यांच्या ‘मोगलमर्दिनी महाराणी ताराराणी’ या ग्रंथावर आधारित ‘मोगलमर्दिनी छत्रपती ताराराणी’ हा चित्रपट लवकरच प्रेक्षकांच्या भेटीस येतोय. मोगलमर्दिनी ‘छत्रपती ताराराणी’ यांची भूमिका अभिनेत्री सोनाली कुलकर्णीने साकारली आहे. याविषयी तिने आपल्या भावना व्यक्त केल्या आहेत.
छत्रपती ताराराणींची भूमिका साकारण्याचा मान मिळाल्याबद्दल सोनाली कुलकर्णी अतिशय आनंदी आहे. शिवाय हा एक सन्मान असून हि एक जबाबदारी असल्याचेदेखील तिने सांगितले. यावेळी सोनाली कुलकर्णी आपल्या भूमिकेबद्दल बोलताना म्हणाली कि, ‘छत्रपती ताराराणी. मराठ्यांच्या स्वातंत्र्य युद्धातील एक रणरागिणी. त्यांचे कार्य, कर्तृत्व दैदिप्यमान आहे. अशा तडफदार व्यक्तिमत्वाची भूमिका साकारायला मिळणे ही माझ्यासाठी सन्मानाची आणि जबाबदारीची गोष्ट आहे’. अलीकडेच या चित्रपटाचा टिझर प्रदर्शित झाला आहे. जो प्रेक्षकांच्या पसंतीस पडला आहे.
प्लॅनेट मराठी, अक्षय विलास बर्दापूरकर आणि मंत्रा व्हिजन प्रस्तुत या चित्रपटाचे क्रिएटिव्ह व्हाईब आणि समीर अरोरा हे सहनिर्माते आहेत. तर या चित्रपटाची पटकथा आणि संवाद डॉ. सुधीर निकम यांचे आहेत आणि चित्रपटाला सुप्रसिद्ध संगीतकार अवधुत गुप्ते यांचे संगीत लाभले आहे. चित्रपटाबाबत दिग्दर्शक राहुल जनार्दन जाधव यांनी सांगितले कि, ‘चित्रपट हे समाजप्रबोधनाचे आणि समाज जागरणाचे सर्वात प्रभावी माध्यम आहे. सध्याच्या आणि येणाऱ्या पिढ्यांवर चांगला प्रभाव पाडणारे, उत्कृष्ट वैयक्तिक आणि सामाजिक मूल्यांची स्थापना करणारे चित्रपट निर्माण होणे ही काळाची गरज आहे म्हणूनच प्रत्येक पिढीतील स्त्रियांना आदर्श वाटावे असे व्यक्तिमत्त्व पडद्यावर आणण्याचा प्रयत्न आम्ही या चित्रपटाद्वारे करत आहोत’.
Discussion about this post