हॅलो बॉलिवूड ऑनलाईन। सोमवारी राज्यभरात नवरात्र उत्सवाला सुरुवात झाली. घटाची स्थापना करीत नवदुर्गेचा पहिल्या रूपाचे आवाहन केले गेले. या दिवसापासून आता पुढे दसऱ्यापर्यंत आदिमायेच्या अलौकिक शक्तीचा सहवास भूतलावर राहील. आनंद, उत्साह आणि जल्लोषमयी हा उत्सव सगळ्यांसाठीच खास असतो. पण सालाबादप्रमाणे हा उत्सव साजरा करताना कुणी एक नसेल तर त्याची सल कशी भरुन निघणार. अशावेळी पुन्हा एकदा आठवणींना पूर येतोच. नवरात्रीनिमित्त सोशल मीडियावर अनेक सेलिब्रिटींनी शुभेच्छापर पोस्ट लिहिल्या. अशीच एक पोस्ट शेअर करताना अभिनेत्री सोनाली कुलकर्णी मात्र आजीच्या आठवणीत पुन्हा भावुक झाली.
सोनालीने आपल्या अधिकृत सोशल मीडियावर हि पोस्ट शेअर करताना आजीच्या आठवणींना आवर्जून उजाळा दिला आहे. सोनालीने आपल्या दिवंगत आजीचे स्मरण करत हि नवरात्रीची पोस्ट शेअर केली आहे. जी मनाला स्पर्शून डोळ्यात टचकन पाणी आणते. यामध्ये तिने तिच्या लग्न सोहळ्यातील आजीसोबतचा एक खास क्षण टिपलेला फोटो शेअर केला आहे.
सोबत कॅप्शनमध्ये लिहिले आहे कि, ‘आज घटस्थापना. माझी आजी घट बसवायची. आज ती नसली तरी मनाच्या देव्ह्यातल्या नवदुर्गांमधे पहिली जागा कायम तिचीच असेल. तुम्हा सर्वांना नवरात्रीच्या हार्दिक शुभेच्छा”. #माझ्यानवदुर्गा #पहिली #आजी #नवदुर्गा #देवी.’
सोनालीच्या या भावनिक पोस्टमुळे तिचे चाहते आणि मित्र मंडळी देखील भावुक झाले आहेत. या पोस्टवर त्यांनी विविध प्रतिक्रिया देत तिचे सांत्वन केले आहे. सोनालीची आजी सुशिला कुलकर्णी यांचे ऑगस्ट महिन्यात निधन झाले. तेव्हाही सोनालीने आजीच्या आठवणीत भावुक पोस्ट शेअर केली होती. सुतकातील हे वर्ष प्रत्येक क्षणाक्षणात आजीची कमी तीला जाणवून देत आहे. सध्या सोनालीने शेअर केलेल्या पोस्टमध्ये तिची आजी तिच्या गालावर गाल लावत लाड करताना दिसते आहे. हा फोटो पाहिल्यावर आजीपेक्षा जास्त प्रेम कुणी कसं करेल..? असा प्रश्न पडतो आणि आपसूकच आपल्या आजीची आठवण करून देतो.
Discussion about this post