हॅलो बॉलिवूड ऑनलाईन। या वर्षामध्ये अत्यंत गाजलेला सिनेमा ‘कांतारा’ हा चांगलाच ब्लॉकबस्टर ठरला. या चित्रपटाने प्रेक्षक आणि समीक्षक सगळ्यांनाच भुरळ घातली. रिपोर्टनुसार कांतारा चित्रपटाने ९.४ इतकं रेटिंग मिळवलं आहे. कन्नड सिनेसृष्टीसाठी हा चित्रपट भव्य यश घेऊन आला. ‘कांतारा’ हा चित्रपट गेल्या दोन महिन्यांपासून बॉक्स ऑफिसवर राज्य करत होता. या चित्रपटाने जगभरातून ४०० कोटींहून अधिक कमाई केली आहे. बॉक्स ऑफिस गाजवल्यानंतर आता हा चित्रपट ओटीटीवर रिलीज होतो आहे. कधी आणि कुठे ते जाणून घेऊया.
बॉक्स ऑफिस गाजवलेला कांतारा ओटीटीवर खूप आधीच रिलीज झाला आहे. पण हिंदीत नाही. त्यामुळे तो कधी एकदा हिंदीत रिलीज होतोय अशी हिंदी भाषिकांना उत्सुकता होती. यानंतर अखेर प्रतीक्षा संपली आहे. कारण दाक्षिणात्य भाषिक ‘कांतारा’ हा आता हिंदीतून ओटीटीवर रिलीजसाठी सज्ज झाला आहे. त्यामुळे कांतारा आता हिंदी भाषिकांना पाहता येईल. लोकप्रिय ओटीटी प्लॅटफॉर्म नेटफ्लिक्सवर हा चित्रपट तुम्हाला हिंदीत पाहता येणार आहे. गेल्या मंगळवारी नेटफ्लिक्सने एका मनोरंजक व्हिडिओसह चित्रपटाची रिलीज डेट जाहीर केली आहे.
त्यानुसार ‘कांतारा’ हा चित्रपट हिंदी भाषेत नेटफ्लिक्सवर येत्या शुक्रवारी अर्थात उद्या ९ डिसेंबर २०२२ रोजी रिलीज होणार आहे. ऋषभ शेट्टीने मुख्य भूमिकेसह या चित्रपटाचे लेखन आणि दिग्दर्शन केले आहे. तर ‘कांतारा’ हा चित्रपट उद्यापासून नेटफ्लिक्स सबस्क्रायबर्सना हिंदीमध्ये पाहता येणार आहे. प्राइम व्हिडिओवर या चित्रपटाची कन्नड आवृत्ती उपलब्ध आहे. ‘कांतारा’ हा चित्रपट ३० सप्टेंबर २०२२ रोजी सिनेमा थिएटरमध्ये प्रदर्शित झाला होता. त्यानंतर २४ नोव्हेंबर २०२२ रोजी दाक्षिणात्य भाषांमध्ये प्राइम व्हिडिओवर प्रदर्शित झाला होता .
Discussion about this post