हॅलो बॉलिवूड ऑनलाईन। चित्रपट असो किंवा वेब सिरीज प्रत्येक कलाकृतीत आपलं १००% देऊन प्रेक्षकांच्या मनावर आपल्या अभिनयाची छाप उमटविणारी अभिनेत्री सुष्मिता सेन अतिशय लोकप्रिय आहे. विविध भूमिकांना न्याय देणे हि बाब सुष्मिताच्या अंगवळणी पडल्यामुळे एखाद्या आव्हानात्मक भूमिकेत तिने दिसावं अशी नेहमीच प्रेक्षकांची अपेक्षा होती. तर हि प्रतीक्षा आता संपणार आहे. कारण सुष्मिता सेन येत्या नव्या वेब सिरीजमध्ये तृतीयपंथीयांची अत्यंत आव्हानात्मक अशी भूमिका साकारणार आहे. मुख्य म्हणजे गौरी सावंत यांच्यावर आधारित हि वेबसिरीज असून त्यांची भूमिका सुष्मिता साकारत आहे.
एकेकाळी ‘विक्स’ कंपनीच्या जाहिरातीतून एक तृतीयपंथी जगासमोर ताठ मानेने उभी राहिली. ती म्हणजे गौरी सावंत. आयुष्यभर लोकांकडून मिळालेली हीन वागणूकही माणसाला पेटवून उठवू शकते याचा प्रत्यय त्यांच्याकडे पाहिल्यावर येतो. एका तृतीयपंथीयाच्या आयुष्यात काय संघर्ष असतो..? तो अनुभवल्याशिवाय समजणे कठीण आहे. आज गौरी सावंत हे नाव घराघरात माहित आहे. पण त्यांनी भोगलेलं दुःख, संघर्ष, कुटुंबाकडून झालेली अवहेलना, वेळप्रसंगी करावा लागणारा वेश्या व्यवसाय याबाबत फार तोडकं मोडकं लोकांना ठाऊक आहे. म्हणून त्यांचा जीवनसंघर्ष घेऊन ही वेबसिरीज लवकरच प्रदर्शित होणार आहे.
‘ताली’ असे या वेबसिरीजचे नाव आहे आणि याचे दिग्दर्शन मराठी दिग्दर्शक रवी जाधव करणार आहेत. आजवर तृतीयपंथीयांचा अभिनय अनेक पुरुष अभिनेत्यांनी केला आहे. अतिशय उत्तम पद्धतीने त्यांनी तृतीयपंथी साकारला असला तरीही पहिल्यांदाच एक अभिनेत्री तृतीय पंथीयाची भूमिका साकारणार आहे हि बाब अत्यंत अभिमानास्पद आहे. सुष्मिता सेनने तिच्या सोशल मीडिया हँडलवर वेब सीरिजमधील फर्स्ट लूक शेअर केला आहे. सोबत कॅप्शनमध्ये लिहिले आहे कि, ‘ताली – बजाऊँगी नहीं, बजवाऊँगी !’. आता या वेब सिरिजचा टीझर कधी येतोय आणि ती कधी प्रदर्शित होते..? याकडे सर्वांचे लक्ष लागले आहे.
Discussion about this post