हॅलो बॉलिवूड ऑनलाईन। बॉलिवूड अभिनेता रणबीर कपूर हा नेहमीच त्याच्या चॉकलेट बॉय अंदाजासाठी चर्चेत राहिला आहे. पण यावेळी मात्र तो चॉकलेट बॉय राहिलेला नाही हे सिद्धच करायचं असं त्याने बहुदा ठरवलं आहे. ब्रह्मास्त्र मधले ऍक्शन सिन पाहिल्यानंतर रणबीर आता इंडस्ट्रीला काहीतरी वेगळं द्यायला सज्ज झाला आहे हे समोर आलं. यानंतर आता रणबीरच्या बहुचर्चित ‘शमशेरा’ या आगामी चित्रपटाचा टिझर प्रदर्शित झाला आहे. कुणीही पाहून थक्क होईल असा हा टिझर आहे. आता टिझर इतका दमदार असेल तर चित्रपटाबाबत उत्सुकता किती असेल याचा अंदाज तुम्ही लावूच शकता.
फर्स्ट लुकनंतर आता शमशेराच्या टीझरने प्रेक्षकांचं लक्ष वेधून घेतलं आहे. हा टिझर यशराज फिल्म्स आणि रणबीर कपूरची पत्नी आणि बॉलिवूड अभिनेत्री आलिया भटने सोशल मीडियावर शेअर केला आहे. या दमदार टीझरची सुरुवात ‘सांसों में तूफानों का डेरा, निगाहें जैसे चील का पहरा। कोई रोक ना पाएगा इसे, जब उठे ये बनके सवेरा।’ अशा या धमाकेदार संवादाने होते. या संवादाला स्वतः रणबीरने आवाज दिला असून त्याच्या आवाजातील धीर गंभीरपणा अंगावर काटा आणतोय. सध्या हा व्हिडीओ टिझर सोशल मीडियावर प्रचंड चर्चेचा विषय ठरला आहे. कारण मुलींचा हँडसम हंक आता हल्कसारख्या ऍक्शन भूमिकेत उतरलाय.
या टीझरमध्ये अभिनेता संजय दत्तचा देखील धमाकेदार अवतार पाहायला मिळतोय. या चित्रपटातून पहिल्यांदाच रणबीर दुहेरी भूमिका साकारणार आहे. त्याच्या एका व्यक्तीरेखेचं नाव शमशेरा तर दुसऱ्या व्यक्तीरेखेचं नाव बल्ली असं असणार आहे. या चित्रपटासाठी रणबीरने आपल्या शरीरावर प्रचंड मेहनत घेतली असल्याचे टीझरमध्ये दिसते आहे. ‘शमशेरा’मध्ये रणबीर कपूर आणि संजय दत्त आमने सामने दिसणार आहेत. यातील काही सिन घोड्यावर बसून शूट करण्यात आले आहेत. रिपोर्टनुसार, एका सीनमध्ये तर ८० घोड्यांचा वापर केलाय. या चित्रपटाचं दिग्दर्शन करण मल्होत्राने केलाय तर या चित्रपटात रणबीर, संजय दत्त, वाणी कपूर, आशुतोष राणा, रोनित रॉय आणि सौरभ शुक्ला यांच्याही महत्त्वपूर्ण भूमिका आहेत. हा चित्रपट येत्या २४ जुलै २०२२ रोजी प्रदर्शित होणार आहे.
Discussion about this post