हॅलो बॉलिवूड ऑनलाईन। नुकतीच प्लॅनेट मराठी या ओटीटी प्लॅटफॉर्मवर जयंत पवार दिग्दर्शित ‘अथांग’ ही वेबसीरिज प्रदर्शित झाली आहे. केवळ २ भाग प्रदर्शित झाले असूनही प्रेक्षकांनी या सीरिजला उदंड प्रतिसाद दिला आहे. सध्या हि वेब सिरीज प्रेक्षकांच्या मनावर अधिराज्य गाजवत आहे. मुख्य म्हणजे या वेब सीरिजच्या माध्यमातून मराठी अभिनेत्री तेजस्विनी पंडितने निर्मिती क्षेत्रात पदार्पण केले आहे. याचा एक वेगळाच आनंद आणि आपली वेब सिरीज यश मिळवते आहे याचा आनंद तेजस्विनीने व्यक्त केला आहे.
वेबसीरीजच्या पहिल्या २ भागांमध्ये सरदेशमुखांच्या रहस्यमय वाड्याचे दरवाजे उघडले आहेत. मात्र अनेक गुपित आणि गूढ या वाड्याच्या तळाशी आहेत हे नक्की. प्रदर्शनाच्या पहिल्याच दिवशी या वेबसिरीजचे व्ह्यूज प्रचंड होते. अगदी रेकॅार्ड ब्रेक यश मिळवणारी ही प्लॅनेट मराठी ओटीटीवरील पहिलीच वेबसीरिज ठरली आहे. यामुळे निर्माती म्हणून तेजस्विनी पंडित आपल्या प्रोजेक्टविषयी जेव्हा म्हणाली तेव्हा तिने प्रचंड आनंद व्यक्त केला आहे.
ती म्हणाली कि, ‘आज माझ्या मनात काय भावना आहेत, त्या मी शब्दांत व्यक्त करूच शकत नाही. निर्माती म्हणून हा माझा पहिलाच प्रोजेक्ट, त्यामुळे हा माझ्यासाठी सुखावणारा क्षण आहे. मात्र याचे सारे श्रेय ‘अथांग’च्या संपूर्ण टीमला जाते. यामागे सगळ्यांचीच मेहनत आहे. प्रेक्षकांच्या खूप सकारात्मक प्रतिक्रिया येत आहेत. प्रेक्षक आता पुढील भागांची आतुरतेने वाट पाहत आहेत.’
प्लॅनेट मराठी ओटीटीवर प्रदर्शित झालेल्या ‘अथांग’ या वेबसिरीजमध्ये संदीप खरे, निवेदिता जोशी – सराफ, धैर्य घोलप, भाग्यश्री मिलिंद, उर्मिला कोठारे, ऋतुजा बागवे, दीपक कदम, ओमप्रकाश शिंदे, केतकी नारायण, शशांक शेंडे, योगिनी चौक आणि रसिका वखारकर यांच्या प्रमुख भूमिका आहेत. प्लॅनेट मराठी, क्रिएटिव्ह वाईब प्रॉडक्शन निर्मित, अक्षय बर्दापूरकर प्रस्तुत ‘अथांग’चे तेजस्विनी पंडित, संतोष खेर निर्माते आहेत. येत्या २ डिसेंबर रोजी या वेब सीरिजचे पुढील २ भाग प्रदर्शित होतील आणि त्यानंतर ९ डिसेंबर रोजी त्यापुढील २ भाग प्रदर्शित होणार आहेत.
Discussion about this post