हॅलो बॉलिवूड ऑनलाईन। रितेश देशमुख दिग्दर्शित ‘वेड’ या चित्रपटाने सर्व प्रेक्षक वर्गाला खरोखरंच वेड लावलं आहे. चित्रपटामधील वेड तुझा, वेड लावलंय, सुख कळले, बेसुरी या गाण्यांना प्रेक्षकांची पसंती दिली आहे. शिवाय रितेश- जिनिलियाची केमिस्ट्रीदेखील त्यांना प्रचंड भावली आहे. अशातच प्रेक्षकांनी काही लहान सहान त्रुटी रितेशच्या लक्षात आणून दिल्या आहेत. अनेकांनी सत्य आणि श्रावणीच्या रोमँटिक गाण्याचीही डिमांड केली होती. त्यामुळे पब्लिक डिमांडनुसार रितेशने चित्रपटात काही बदल केले आहेत आणि या बदलांसह हा चित्रपट उद्यापासून प्रदर्शित होणार आहे. अभिनेता आणि दिग्दर्शक रितेश देशमुखने सोशल मीडियावर एक व्हिडीओ शेअर करत ‘वेड’ चित्रपटाच्या एक्सटेंडेट व्हर्जनबाबत माहिती दिली आहे.
या व्हिडिओत रितेश देशमुखने सांगितले आहे कि, ‘वेड या चित्रपटाला तुम्ही सर्वांनी भरभरुन प्रेम दिल्याबद्दल मी आणि टीम ‘वेड’ तुमचे आभार मानतो. आम्ही जेव्हा वेड चित्रपटाचं प्रमोशन करत होतो तेव्हा अनेकांनी आम्हाला विचारलं की, सत्या आणि श्रावणी यांचे रोमँटिक गाणे कुठे आहे..? त्यानंतर आम्हाला वाटलं की, अजूनही वेळ गेली नाही आपण नवं गाणं रेकॉर्ड करुन चित्रपटात वापरु शकतो. आम्ही वेड तुझे हे गाणं सत्या आणि श्रावणीवर शूट केलं आहे. तुमच्या आवडत्या पात्रांचं हे गाणं तुम्हाला २० तारखेपासून चित्रपटगृहात पाहता येणार आहे.’
पुढे म्हणाला कि, ‘वेड चित्रपटात काही बदल करण्यात आले आहेत. काही लोक आम्हाला म्हणत होते की, सलमान भाऊचं गाणं चित्रपटाच्या शेवटी आहे, ते चित्रपटाच्यामध्ये असलं पाहिजे. तर आता ते गाणं चित्रपटाच्यामध्ये आहे. तसेच सत्या आणि त्याचे वडील, श्रावणी आणि अशोक मामा यांचे काही नवे सीन्स देखील चित्रपटात दाखवण्यात येणार आहेत. त्यामुळे २० जानेवारीपासून तुम्ही वेड या चित्रपटाचं एक्सटेंडेट व्हर्जन चित्रपटगृहात पाहू शकता. शुक्रवारी सिनेमा लव्हर्स डे आहे आणि या निमित्ताने तुम्ही ९९ रुपयांमध्ये वेड चित्रपट पाहू शकता.’
Discussion about this post