हॅलो बॉलिवूड ऑनलाईन। स्टार प्रवाहवरील अनेक मालिका लोकप्रिय आहेत. त्यांपैकी एक म्हणजे ‘ठरलं तर मग’. या मालिकेने अगदी काहीच दिवसांत आपला मोठा चाहतावर्ग तयार केला आहे. अलीकडेच या मालिकेने १०० भागांचा टप्पा गाठला आहे. स्टार प्रवाहवरील ‘आई कुठे काय करते’, ‘रंग माझा वेगळा’, ‘सुख म्हणजे नक्की काय असतं’ यांसारख्या टीआरपीत अव्वल असणाऱ्या मालिकांनाही या मालिकेने मागे टाकलं आहे. गेल्या काही दिवसांत या मालिकेचा आलेख उंचावत चालला आहे. दरम्यान मालिकेतील सायली आणि प्रिया यांच्यावरील चित्रित एक नवा प्रोमो रिलीज झाला आहे. जो चांगलाच व्हायरल होतोय.
स्टार प्रवाह वाहिनीच्या अधिकृत सोशल मीडिया हँडलवर हा प्रोमो शेअर करण्यात आला आहे. यामध्ये तन्वी बनून वावरणारी प्रिया पूर्णा आजीकडे रडत रडत सायलीने आपल्याला मारल्याची तक्रार करते. ती पूर्णा आजीला सांगते की, सायलीने तिच्यावर हात उगारला, तिला मारलं. चेहऱ्यावर जखमा दाखवून ती आपले म्हणणे सिद्ध करते आणि ते पाहून पूर्णा आजीला सायलीची चूक असल्याचे पटते. यामुळे पूर्णा आजी सायलीला सर्वांसमोर तन्वीची माफी मागायला लावते. इथे कुणाशीही वाद न घालता सायली तन्वीची माफी मागते आणि तन्वीने माफ केल्यानंतर तिला स्वत:च्या खोलीत घेऊन जाते.
खोलीत आल्यावर सायली तन्वीला म्हणजेच प्रियाला म्हणते, ‘आज तू माझ्यावर मी तुला मारलं असा आळ आणलास? यावर प्रिया तिला म्हणते, ‘आता तू काय करशील?’ प्रिया तीच वाक्य म्हणताच सायली तिच्या थोबाडात देते. सायलीचा हा डॅशिंग अंदाज प्रेक्षकांना तर फार आवडला आहे. हा प्रोमो चांगलाच व्हायरल होतो आहे आणि या एपिसोडची प्रेक्षक आतुरतेने वाट पाहत आहेत. ‘ठरलं तर मग’ या मालिकेत अभिनेत्री जुई गडकरी, अमित भानुशाली, प्रियांका तेंडोलकर, ज्योती चांदेकर, माधव अभ्यंकर, मीरा जगन्नाथ, सागर तळशीकर, प्राजक्ता दिघे हे कलाकार महत्वाच्या भूमिकेत आहेत.
Discussion about this post