हॅलो बॉलिवूड ऑनलाईन। रवी जाधव दिग्दर्शित आणि प्रथमेश परब, ऋता दुर्गुळे अभिनित मराठी चित्रपट ‘टाईमपास 3’ने बॉक्स ऑफिसवर चांगली कमाई केली आहे. या चित्रपटातून दगडू आणि पालवीने प्रेक्षकांच्या मनावर चांगलीच छाप पाडली आहे. ‘टाईमपास 3’च्या संपूर्ण टीमने प्रेक्षकांचे पुरेपूर मनोरंजन केले. पण तरीही काही प्रेक्षकांना आपापल्या व्यग्र जीवनशैलीमुळे हा चित्रपट पाहता आला नाही. काय सांगता..? तुम्हीही नाही पाहिलात का….? मग आता बघायची संधी आहे ती सोडू नका. आता तुम्ही घरबसल्या ‘ZEE5’ या ओटीटी प्लॅटफॉर्मवर हा चित्रपट पाहू शकणार आहात.
टाईमपास सीरिजच्या सर्व चाहत्यांसाठी हि अतिशय आनंदाची बातमी आहे कि, ‘दोन नंबर लव्हचा हा एक नंबर लोचा’ घेईन दगडू आणि पालवी आजपासून अर्थात १६ सप्टेंबर २०२२ पासून ‘ZEE5’ या ओटीटी प्लॅटफॉर्मवर भेटायला आले आहेत.
एखाद्या चित्रपटाचा तिसरा भाग प्रदर्शित करून प्रेक्षकांना हवं ते देणं सोप्प नसत. पण रवी जाधव यांनी हे करून दाखवलं. आतापर्यंत दगडू आणि पराजूची लव्हस्टोरी आपण पाहिली होती पण या चित्रपटातून दगडू सोबत न फुटणारी पण समोरच्याला फोडणारी पालवी पाहायला मिळाली.
झी स्टुडिओज आणि अथांश कम्युनिकेशनची निर्मित आणि रवी जाधव दिग्दर्शित या चित्रपटात दगडूच्या भूमिकेत अभिनेता प्रथमेश परब तर पालवीच्या भूमिकेत फुलपाखरू फेम अभिनेत्री हृता दुर्गुळे दिसते आहे.
याशिवाय वैभव मांगले, भाऊ कदम, आरती वडगबाळकर, संजय नार्वेकर, अन्विता फलटणकर अशी तगडी स्टारकास्ट या चित्रपटात आहे. या चित्रपटात एकूण ५ गाणी असून यांचे लेखन क्षितीज पटवर्धन यांनी केले आहे.
तसेच संगीत अमितराज यांचे आहे. तर चित्रपटाची कथा रवी जाधव यांची असून प्रियदर्शन जाधव याने पटकथा व सवांद लिहिले आहेत. हा चित्रपट एक फुल्ल पॅकेज मनोरंजन आहे. त्यामुळे यावेळी चित्रपट पाहण्याची संधी अजिबात सोडू नका.
Discussion about this post