हॅलो बॉलिवूड ऑनलाईन। झी मराठी वाहिनीवरील मालिका ‘तू तेव्हा तशी’ हि सौरभ आणि अनामिका यांच्या जोडीने गाजवली. सौरभ पटवर्धन आणि अनामिका दीक्षित यांच्या चाळिशीतल्या प्रेमाची हि गोष्ट प्रेक्षकांना आधी खटकली पण पुढे प्रेक्षक या मालिकेच्या कधी प्रेमात पडले तेच कळलं नाही. मालिकेतील दमदार ट्विस्टने प्रेक्षकांचं मन शेवटी जिंकलंच. या मालिकेने नुकतेच तब्बल ३०० भाग पूर्ण केले आहेत. प्रचंड ट्रोलिंगनंतरही या मालिकेने हे यश गाठले आहे. आता कुठे या मालिकेतील कलाकार प्रेक्षकांच्या मनात शिरले आहेत आणि असे असताना जी मालिका लवकरच प्रेक्षकांचा निरोप घेणार असे समजत आहे,
‘तू तेव्हा तशी’ या मालिकेने प्रेक्षकांचे मन जिंकायला वेळ घेतला पण आता हि मालिका चांगलीच लोकप्रिय ठरली आहे. या मालिकेतून मराठी अभिनेता स्वप्नील जोशी आणि अभिनेत्री शिल्पा तुळसकर यांनी बऱ्याच काळानंतर मालिकाविश्वात कमबॅक केलेलं. त्यांची सौरभ आणि अनामिका ही जोडी लोकप्रिय ठरली. वयाच्या चाळीशीत प्रेमासाठी थांबलेला सौरभ आणि पुन्हा प्रेमात पडलेली अनामिका सगळ्यांनाच प्रिय वाटू लागली. यामुळे हि रील लाईफ जोडी आणि ‘तू तेव्हा तशी’ मालिका प्रेक्षकांच्या प्रेमास पात्र ठरली. सध्या हि मालिका रंजक वळणावर आहे. मालिकेतील वल्ली सतत अनामिका आणि सौरभला वेगळं करण्यासाठी कारस्थान रचते. ज्यामुळे पुन्हा एकदा सौरभ आणि अनामिकाला प्रेमाच्या कसोटीवर खरं उतरावं लागणार आहे.
त्यांनी आता एकमेकांपासून दूर राहण्याचा निर्णय घेतला असून मालिकेत पुढे काय घडणार..? आता हे दोघे एकत्र कधीच येणार नाहीत का..? कि एकत्र येतील ते कायमचे..? असे प्रश्न प्रेक्षकांना पडले आहेत. पण यापैकी एका प्रश्नाचं उत्तरचं या मालिकेच्या सांगतेकडे नेणार आहे. तरीही अद्याप मालिका संपण्याविषयी निर्मात्यांनी कोणीतीही वाच्यता केलेली नाही. त्यामुळे पुढे काय होणार..? याबाबत अधिक चर्चा सुरु आहे.
मात्र ‘तू तेव्हा तशी’ ही मालिका रात्री ८ वाजता प्रसारित व्हायची. तिची जागा लवकरच ‘तुला शिकवीन चांगलाच धडा’ ही नवी मालिका घेणार आहे. ज्यामध्ये शिवानी रांगोळे आणि हृषिकेश शेलार हे कलाकार मुख्य भूमिकेत आहेत. यामुळे ‘तू तेव्हा तशी’ या मालिकेला प्रेक्षकांना निरोप द्यावाच लागेल असे वाटत आहे.
Discussion about this post