हॅलो बॉलिवूड ऑनलाईन। मराठी नाटक, मालिका, चित्रपट अशा विविध माध्यमांतून प्रेक्षकांचे भरभरून मनोरंजन करणारा अभिनेता म्हणजे भरत जाधव. भरत यांचे अनेक चित्रपट आणि नाटकं प्रेक्षकांनी अक्षरशः डोक्यावर उचलून घेतली आहेत. अनेकदा ते सोशल मिडीयावर सक्रिय असल्यामुळे चाहत्यांसाठी विविध पोस्ट शेअर करत असतात. कधी किस्से, कधी आठवणीदेखील ते शेअर करतात. यावेळी त्यांनी चक्क ‘घोटाळे’ या विषयावर पोस्ट शेअर केली आहे. हा विषय काही राजकीय नाही. पण त्यांच्या कारकिर्दीशी जोडलेला आहे एव्हढं नक्की!
त्याच काय आहे, केदार शिंदे दिग्दर्शित आणि सिद्धार्थ जाधव, सोनाली कुलकर्णीसह भरत जाधव अभिनित ‘बकुळा नामदेव घोटाळे’ या चित्रपटाला तब्बल १५ वर्ष पूर्ण झाली. दिनांक १२ ऑक्टोबर २००७ साली प्रदर्शित झालेल्या या चित्रपटाला बुधवारी १२ ऑक्टोबर २०२२ रोजी तब्बल १५ वर्षे झाली. यानिमित्त अभिनेता भरत जाधव यांनी हि खास पोस्ट शेअर केली आहे. या चित्रपटात भरत यांनी ‘सरपंच घोटाळे’ हे पात्र साकारले होते. त्यांचे हे पात्र, त्याचा लुक, त्याची बोलण्याची पद्धत, संवाद शैली सगळं तुफान होतं. वेंधळा नाम्या, देखणी आणि तितकीच खमकी त्याची बायको बकुळा आणि तिच्यामागे हात धुवून लागलेला कपटी सरपंच घोटाळे या तिघांनी मिळून प्रेक्षकांचे मनोरंजन केले होते. हा चित्रपट चंगळच गाजला होता.
यानिमित्त एक भावना व्यक्त करणारी दिलखुलास पोस्ट शेअर करत अभिनेता भरत जाधव म्हणाले कि, ‘१५ वर्षांपूर्वी जेंव्हा हा सिनेमा प्रदर्शित झाला तेंव्हा घोटाळे च्या लुकवर काही प्रमाणात टीका झाली होती. त्यावेळी स्वप्नातही वाटलं नव्हतं की नंतर या पात्राला इतकं अमाप प्रेम मिळेल. युट्यूब वर कमेंट्स मध्ये घोटाळे या पात्रासाठी लोकं भरभरून कमेंट करतात , घोटाळेच्या तोंडी असलेले इरसाल संवाद अजूनही लोकं तितकंच एन्जॉय करतात याचं कलाकार म्हणून विलक्षण समाधान वाटतं…!! या यशाचं सार श्रेय संपूर्ण टीमच आणि लेखक दिग्दर्शक केदार शिंदेंच. १५ वर्ष झाली…. आता घोटाळे सुटायला पाहिजे गड्या…भकासपूर वाट पाहतोय..!!!’
Discussion about this post