हॅलो बॉलिवूड ऑनलाईन। सखे गं टाक ‘पुढचं पाऊल..’ हि मालिका आजही प्रेक्षकांच्या लक्षात असेल यात काहीच वाद नाही. कारण स्टार प्रवाह वरील अत्यंत गाजलेल्या आणि सर्वाधिक लोकप्रिय ठरलेल्या या मालिकेचा प्रेक्षक वर्ग प्रचंड मोठा होता. या मालिकेतून घराघरात पोहोचलेली आदर्श सूनबाई ‘कल्याणी’ अर्थात जुई गडकरी आता पुन्हा एकदा मालिका विश्वातून प्रेक्षकांच्या भेटीस येत आहे. स्टार प्रवाह वरील ‘ठरलं तर मग’ या नव्या कोऱ्या मालिकेतून जुई गडकरी येत्या काळात मुख्य भूमिकेत झळकणार आहे.
‘ठरलं तर मग’ या मालिकेत जुई गडकरी सायली नामक एका मुलीचे पात्र साकारते आहे. या भूमिकेविषयी बोलताना जुई म्हणाली कि, ‘ही मालिका करताना मला अतिशय आनंद होत आहे. माहेरी आल्याची भावना आहे. पुढचं पाऊल मालिकेतल्या कल्याणीवर प्रेक्षकांनी भरभरुन प्रेम केलं आहे. त्यामुळे या नव्या पात्रावरही प्रेक्षक भरभरुन प्रेम करतील याची मला खात्री आहे. सायली अतिशय समजूतदार आणि स्वतंत्र विचारांची मुलगी आहे. अनाथ असली तरी नात्यांचं महत्व जाणणारी आणि अन्याय सहन न करणारी मात्र प्रचंड वेंधळी अशी हि मुलगी आहे. सायलीच्या वेंधळेपणामुळेच मालिकेत मजेशीर प्रसंगही पहायला मिळतील. सर्वात महत्त्वाचं म्हणजे मालिकेची कथा हे मालिकेचं बलस्थान आहे. त्यामुळे मी स्वत:ला भाग्यवान समजते की इतक्या छान प्रोजक्टचा मला भाग होता आलं.’
माहितीनुसार, ‘ठरलं तर मग’ या मालिकेचे ‘एकमेकांना घासातला घास द्यायचा…’ हे ब्रीदवाक्य आहे. या मालिकेची निर्मिती आदेश आणि सुचित्रा बांदेकर यांच्या सोहम प्रोडक्शन्सने केली आहे. तर मालिकेचे दिग्दर्शन सचिन गोखले हे करणार आहेत. नुकताच या मालिकेचा पहिला वहिला प्रोमो सोशल मिडियावर प्रदर्शित करण्यात आला आहे. ज्याला प्रेक्षकांनी चांगली पसंती दिली आहे. यामध्ये सायली अर्थात जुई गडकरी एका अनाथ आश्रमात तेथील मुलांची देखभाल करताना दिसते आहे. त्यांच्या भुकेसाठी ती स्वतः उपाशी राहते, पण तिथे असणारे आजोबा मात्र तिला मायेने जेवू घालतात. असा काहीसा भावनिक प्रसंग यात दाखवला आहे.
Discussion about this post