हॅलो बॉलिवूड ऑनलाईन। ‘रावरंभा’ हा ऐतिहासिक मराठी चित्रपट आहे. जो अलीकडेच २६ मे २०२३ रोजी प्रदर्शित झाला आहे. हा चित्रपट इतिहासाच्या पानांमध्ये दुर्लक्षित केला गेलेला ‘प्रेम अध्याय’ आहे. संघर्षाच्या पार्श्वभूमीवर घडलेली हि रोमांचकारी प्रेमकथा सध्या प्रेक्षकांचे प्रेम मिळवत आहे. या चित्रपटात ओम भूतकर, मोनालिसा बागल हे मुख्य भूमिकेत आहेत तर अशोक समर्थ, संतोष जुवेकर, कुशल बद्रिके, अपूर्वा नेमळेकर, किरण माने इत्यादी कलाकारही या चित्रपटात महत्वपूर्ण भूमिकेत आहे. शंतनू मोघे छत्रपती शिवाजी महाराजांच्या भूमिकेत आहे. या चित्रपटातून पहिल्यांदाच कुशल बद्रिके नकारात्मक भूमिकेत दिसतो आहे. या चित्रपटातबद्दल कुशने एक पोस्ट शेअर केली आहे.
कुशल बद्रिके हा ‘रावरंभा’ चित्रपटात क्रूरकर्मा ‘कुरबतखान’ या दमदार व्यक्तिरेखेत दिसतो आहे. त्याने या चित्रपटाबद्दल एक पोस्ट शेअर करत लिहिले आहे कि, ‘मुलांना स्पायडरमॅन कळायला हवा, पण घोरपडीच्या सहाय्याने गड चढणारा “तानाजी मालुसरे” आधी कळायला हवा. मुलांना स्पार्टन- ३०० ची गोष्ट कळायला हवी, पण पावनखिंडीवर बाजीप्रभू देशपांडेंसह प्राणांची आहुती देणारे “३०० मावळे” आधी कळायला हवेत. लढाई जिंकून देणारा महाबली हल्क मुलांना माहित हवा, पण शौर्य आणि इमान यांच दुसरं नाव असलेले सरसेनापती “हंबीरराव मोहिते” आधी कळायला हवेत’.
पुढे लिहिलंय, ‘आयर्न मॅन ची गोष्ट मुलांना आपण सांगायलाच हवी, पण लोखंडाच्या सळ्यांनी डोळ्यांच्या खाचा झाल्या तरीही एकही हुंदका न देणारे आपले “छत्रपती संभाजी राजे” आधी कळायला हवेत. कॅप्टन अमेरिकेच्या नेतृत्वाला लाजवील असं आपल्या “छत्रपती शिवाजी महाराजांचं” नेतृत्व मुलांच्या मनातच नाही तर रक्तात भिनायला हवं. आपले सुपरहिरोज मुलांना आधी कळायला हवेत. यावेळी आम्ही घेऊन आलोय आपल्या अशाच “7सुपरहिरो” ची कहाणी…. वेडात दौडलेल्या त्या “सात वीरांची” गोष्ट सरसेनापती “प्रतापराव गुजर” आणि सोबतीच्या “सहा मावळ्यांची” गोष्ट, मुलांना ही गोष्ट बघायला नक्की घेऊन या. सिनेमा :- “राव रंभा” आपल्या जवळच्या चित्रपटगृहात’.
Discussion about this post