हॅलो बॉलिवूड ऑनलाईन। सध्या मनोरंजन विश्वात ओटीटी प्लॅटफॉर्मने एक वेगळीच जागा निर्माण केली आहे. त्यामुळे एखादा चित्रपट जर थिएटरमध्ये पाहता आला नाही तर तो ओटीटीवर कधी येणार याची प्रतीक्षा प्रेक्षकांना असते. विजयादशमीच्या मुहूर्तावर शिवरायांचा जाज्वल्य इतिहास सांगणारा मराठी ऐतिहासिक चित्रपट ‘शिवप्रताप गरुडझेप’ प्रदर्शित झाला होता. या मराठी चित्रपटाने बॉक्स ऑफिसवर यश मिळवल्यानंतर आता हा चित्रपट ओटीटीवर प्रदर्शित झाला आहे. शुक्रवार ४ नोव्हेंबर २०२२ पासून ‘टीएफएस प्ले’ (TFS PLAY) या ओटीटी अॅपवर हा चित्रपट प्रदर्शित झाला आहे. यासाठी ‘टीएफएस प्ले’ फ्री डाऊनलोड करा आणि अवघ्या ९९ रूपयांत चित्रपट पाहता येईल.
या प्रदर्शनाबाबत चित्रपटातील मुख्य भूमिका अर्थात छत्रपती शिवाजी महाराज यांच्या भूमिकेत दिसणारे अभिनेते डॉ. अमोल कोल्हे यांनी भावना व्यक्त केल्या आहेत. ते म्हणाले कि, ‘आमच्यासाठी ही अतिशय आनंदाची बाब आहे. मोठया पडद्यानंतर ओटीटीवर ‘शिवप्रताप गरुडझेप’ चित्रपट प्रेक्षकांना अनुभवायला मिळणार आहे. प्रत्येक माध्यमाची स्वतःची ताकद आणि ओळख आहे. ओटीटीच्या माध्यमातून छत्रपती शिवाजी महाराजांचा देदिप्यमान इतिहास जगभरातील प्रेक्षकांपर्यंत पोहचेल हे आमच्यासाठी अतिशय महत्त्वपूर्ण आहे.’
‘जगदंब क्रिएशन्स’ची निर्मित ‘शिवप्रताप गरुडझेप’ या चित्रपटात डॉ. अमोल कोल्हे शिवरायांच्या भूमिकेत दिसत आहेत. तर यांच्यासोबत यतीन कार्येकर, प्रतीक्षा लोणकर, हरक अमोल भारतीया, शैलेश दातार, हरीश दुधाडे, मनवा नाईक, पल्लवी वैद्य, अजय तपकिरे, रमेश रोकडे, अलका बडोला कौशल, आदी ईराणी, विश्वजीत फडते आदी कलाकारांच्या अन्य मुख्य भूमिका आहेत. डॉ. अमोल रामसिंग कोल्हे, विलास सावंत, सोनाली घनश्याम राव, चंद्रशेखर ढवळीकर, कार्तिक राजाराम केंढे हे या चित्रपटाचे निर्माते आहेत. तर प्रफुल्ल तावरे सहनिर्माते आहेत. तसेच रविंद्र मानकामे कार्यकारी निर्माते आहेत. शिवाय छायाचित्रण संजय जाधव यांचे असून संकलन पीटर गुंड्रा यांचे आहे.
Discussion about this post