हॅलो बॉलिवूड ऑनलाईन। मराठी मनोरंजन विश्वातील प्रसिद्ध दिग्दर्शक केदार शिंदे यांचा आगामी बहुचर्चित चित्रपट ‘महाराष्ट्र शाहीर’ कधी प्रदर्शित होतो याकडे अख्खा महाराष्ट्र डोळे लावून बसला आहे. हा चित्रपट महाराष्ट्राचे लाडके शाहीर.. कृष्णराव साबळे यांच्या जीवनावर आधारित असून या मुख्य भूमिकेत अभिनेता अंकुश चौधरी दिसणार आहे. त्यामुळे या चित्रपटाविषयी प्रत्येकात एक विशेष आणि वेगळीच उत्सुकता निर्मांण झाली आहे. अशातच आता या चित्रपटाचे नवेकोरे मोशन पोस्टर रिलीज झाले आहे. जे अगदी तासाभरातच सोशल मीडियावर व्हायरल झाले आहे.
या नव्या टीझर व्हिडीओमध्ये महाराष्ट्र शाहीरचे नवे आणि अत्यंत लक्षवेधी पोस्टर रिलीज करण्यात आले आहे. जे सोशल मीडियावर प्रचंड व्हायरल होऊ लागले आहे. नेटकऱ्यांनी या नव्या पोस्टरला विशेष पसंती दिली आहे. एका घट्ट दगडी मुठीवर महाराष्ट्राचे लाडके शाहीर यांच्या भूमिकेतला अभिनेता अंकुश चौधरी साद घालताना या पोस्टरमध्ये दिसत आहेत. एक हात कानाला आणि दुसरा सुरांच्या दिशेने…. तर मागे फडकणारा भगवा काळजाचा ठोका चुकवतो आहे. हे पोस्टर अतिशय सुंदर पद्धतीने तयार करण्यात आले असून या पोस्टरचा नेमकेपणा कौतुकाचा विषय ठरतो आहे.
हे मोशन पोस्टर शेअर करताना केदार शिंदे यांनी कॅप्शनही अगदी उठावदार दिले आहे. त्यांनी कॅप्शनमध्ये हिले आहे कि, ‘फडकेल नव्याने भगवा.. महाराष्ट्र पुन्हा गर्जेल.. जनतेचा बुलंद आवाज.. लेखणीतूनी बरसेल.. देऊनी डफावर थाप.. ललकारत होते जाहीर.. अर्पितो तुम्हाला तुमचे.. तुमचाच.. महाराष्ट्र शाहीर.. शाहीर साबळे ह्यांची भव्य जीवनगाथा २८ एप्रिल २०२३ पासून तुमच्या नजीकच्या चित्रपटगृहात..’ या पोस्टवर अनेक चाहत्यांनी आणि नेटकऱ्यांनी विविध प्रतिक्रिया देत पोस्टरचे स्वागत आणि चित्रपटाबाबत असणारी उत्सुकता दर्शवली आहे.
Discussion about this post