हॅलो बॉलिवूड ऑनलाईन। अभिनेता संतोष जुवेकर हा सोशल मीडियावर फार सक्रिय असतो. ज्यामुळे सोशल मीडियावर त्याच्या फॉलवर्सची संख्या चांगलीच मोठी आहे. संतोष अनेकदा विविध फोटो तसेच व्हिडीओ आणि पोस्ट शेअर करत नेटकऱ्यांचे लक्ष वेधून घेत असतो. अलीकडेच त्याने ‘रावरंभा’ या ऐतिहासिक चित्रपटात निगेटिव्ह भूमिका साकारून प्रेक्षकांचं मन पुन्हा एकदा जिंकलं आहे. यानंतर तो अनेकदा विविध पोस्ट शेअर करताना दिसला. नुकतेच त्याने उज्जैनच्या कालभैरवाचे दर्शन घेतले आहे आणि या संदर्भात त्याने एक पोस्ट शेअर केली आहे. यावेळी त्याच्यासोबत अभिनेता आकाश ठोसर आणि निर्माते महेश पटेलदेखील होते. त्यामुळे संतोष आणि आकाश हे लवकरच एकत्र स्क्रीन शेअर करताना दिसतील असे वाटत आहे.
अभिनेता संतोष जुवेकर, आकाश ठोसर आणि निर्माते महेश पटेल यांनी उज्जैनच्या महाकाल आणि कालभैरवाचे दर्शन घेतले. यावेळी त्यांनी मंदिरात पूजा अन महादेवाचा अभिषेक, आरतीदेखील केली. संतोषने शेअर केलेल्या या व्हिडीओमध्ये तो, आकाश आणि महेश पटेल हे महादेवाची मनोभावे पूजा करताना दिसत आहेत. शिवाय या पूजाविधींसाठी त्यांनी पारंपरिक वस्त्र परिधान केल्याचे दिसत आहे. या पोस्टसोबत संतोषने कॅप्शनमध्ये लिहिले आहे कि, ‘आमच्या महेश दादामुळे सध्या अनेक देवस्थानांच्या दर्शनाचं पुण्य मला मिळतंय. काल पहिल्यांदा उज्जैन येथे महाकाल आणि काल भैरवनाथचे दर्शन घेतलं.अगदी अभिषेक सुद्धा करायला मिळाला. मी अंधश्रद्धाळू अजिबात नाही पण एक वेगळीच ऊर्जा जाणवली त्याच्या गाभाऱ्यात तशीच ऊर्जा मला अनेक मंदिरात जाणवली आहे’.
पुढे म्हणाला, ‘मी चर्चमध्येसुद्दा जातो. गोव्यात गेलो की काही जुनी चर्च आहेत मला आवडतं तिथे जायला. मी दरग्यातही जातो नाशिकहून ठाण्याकडे येताना घाट संपला की डाव्या बाजूला एक दर्गा आहे. मी न चूकता त्या दरग्यात जातोच जातो. त्या चर्च आणि दर्ग्यातही मला तीच ऊर्जा जाणवते आणि ती सकारात्मक ऊर्जा कायम आपल्या सोबत रहावी ही प्रार्थना मी करतो कायम. पण मला आज त्या मंदिरातल्या देवाला त्या चर्च मधल्या येशूला आणि त्या दरग्यातल्या अल्ल्हाला सांगायचंय तुझ्या गाभाऱ्यात ही जी सकारात्मक ऊर्जा आहे ती संपूर्ण विश्वात भरुदे हा सुद्धा तुझाच तर गाभारा आहे ना’. संतोषने शेअर केलेल्या व्हिडीओइतकेच त्याचे कॅप्शनही चर्चेत आले आहे. आकाश ठोसरनेदेखील इंस्टाग्राम स्टोरीमध्ये उज्जैनच्या महाकाल मंदिरातील काही फोटो आणि व्हिडीओ शेअर केले आहेत.
Discussion about this post