हॅलो बॉलिवूड ऑनलाईन। झी मराठी वाहिनीवरील ‘रात्रीस खेळ चाले’ या मालिकेला प्रेक्षकांनी प्रचंड प्रेम दिले. या मालिकेतील प्रत्येक पात्रावर प्रेक्षकांनी प्रेम केले. अण्णा नाईक, शेवंता ते दत्ता, माधव, पांडू अशा प्रत्येक व्यक्तिरेखेला प्रेक्षकांनी डोक्यावर उचलून घेतलं. या मालिकेतून दत्ता हे पात्र साकारत अभिनेता सुहास शिरसाट प्रकाश झोतात आला. सोशल मीडियावर त्याचा मोठा चाहता वर्ग आहे. नुकताच त्याने पुनर्विवाह केल्याने सोशल मीडियावर त्याची चर्चा रंगली आहे. त्याच्या दुसऱ्या लग्नाचा व्हिडीओ सोशल मीडियावर व्हायरल होतो आहे.
अभिनेता सुहास शिरसाट याने आपल्या पत्नीसह ९ जून २०२३ रोजी पुन्हा एकदा लग्नगाठ बांधली आहे. सुहासची पत्नी स्नेहा माजगावकर हीदेखील एक उत्तम अभिनेत्री असून सध्या ती झी मराठीवरील ‘तू चाल पुढं’ या कार्यक्रमात प्राजक्ता हे पात्र साकारते आहे. सुहास आणि स्नेहा यांच्या लग्नाच्या वाढदिवसानिमित्त त्यांच्या कुटुंबीयांनी आणि मित्र मैत्रिणींनी ९ जूनला त्यांचं पुन्हा एकदा लग्न लावून दिल.सुहास आणि स्नेहा यांच्या सुखी संसाराची १० वर्षे पूर्ण झाली असून त्यांच्या या पुनर्विवाहाचा व्हिडीओ तुफान व्हायरल होतो आहे.
याशिवाय १० जूनला सुहासचा वाढदिवस होता. यानिमित्त सर्वांनी मिळून धमाल मजा मस्ती केली. हा व्हिडीओ शेअर करत स्नेहाने कॅप्शनमध्ये लिहिले आहे कि, ‘लग्नाच्या दहा वर्षांनंतर त्याच दिवशी आम्हाला गोड माणसांकडून एक गोड सरप्राइज मिळालं. त्यांनी आमचं पुन्हा लग्न लावून दिलं. ९ व १० जून हे दोन दिवस आमच्यासाठी खूप महत्त्वाचे आहेत. ९ जूनला लग्नाचा वाढदिवस. तर १० जूनला सुहासचा वाढदिवस. हे दोन्ही दिवस या माणसांमुळे अगदी आनंदाचे गेले. सगळ्यांना खूप सारं प्रेम’.
Discussion about this post