हॅलो बॉलिवूड ऑनलाईन। बॉलिवूड अभिनेता शाहिद कपूरने आपल्या अभिनयाने सिनेविश्वात स्वतःची जागा निर्माण केली आहे. त्यामुळे त्याचा मोठा चाहता वर्ग आहे. शाहीदने साकारलेला कबीर सिंग तर चांगलाच गाजला. लोकांनी त्याच्या या भूमिकेवर प्रचंड प्रेम केले. यानंतर आता शाहिद कपूर ओटीटीवर पदार्पण करीत आहे. आगामी क्राईम ड्रामा वेब सिरीज ‘फर्जी’मध्ये शाहिद कपूर महत्वाच्या आणि वेगळ्या भूमिकेत दिसणार आहे. या वेब सिरीजचा फर्स्ट लूक त्याने सोशल मीडियावर शेअर केला आहे.
‘फर्जी’ या आगामी वेब सिरिजमधील शाहिदच्या भूमिकेचा फर्स्ट लूक त्याने शेअर केला आहे. यामध्ये शाहिद एक चित्र रेखाटताना दिसतो आहे. ‘हे माझ्या आयुष्यातील एक नवं पर्व आहे, लोकांना हे आवडेल का…? अखेर कलाकार हा नेहमीच कलाकार असतो नाही का…?’ असे यामध्ये तो बोलताना दिसतोय. तर ‘फर्जी’ ही वेबसीरिज एक क्राइम ड्रामा आहे. जी एका कलाकाराच्या आयुष्यावर आधारित आहे. हि वेब सिरीज अत्यंत रंजक आणि प्रेक्षकांना खिळवून ठेवणारी असणार आहे. लवकरच प्राइम व्हिडिओवर ही वेबसीरिज प्रदर्शित होणार असून यामध्ये शाहिद कपूरसह विजय सेतुपती, झाकीर खान, केके मेनन, अमोल पालेकर, राशी खन्ना कुब्रा सैत हे कलाकार महत्त्वाच्या भूमिकेत दिसणार आहेत.
या वेबसीरिजविषयी बोलताना शाहिद कपूरने एका माध्यमाला मुलाखत दिली आहे. यावेळी तो म्हणाला, ‘ओटीटीवर पदार्पण करणं हे माझ्यासाठी एखादा ट्रेंड मोडण्यासारखं आहे. मला स्वतःला आव्हान द्यायला आवडतं. गेली २० वर्षं मी हेच करत आलो आहे. एखाद्या वेबसीरिजच्या ८ भागात एखादं पात्र कशापद्धतीने खुलवलं जातं हे जाणून घेण्यासाठी मी प्रचंड उत्सुक आहे. चित्रपटातील २ तासांच्या भूमिकेपेक्षा हे प्रचंड वेगळं आणि आव्हानात्मक आहे, मला यात काम करायला प्रचंड मजा आली.’
Discussion about this post