हॅलो बॉलिवूड ऑनलाईन। पुनित बालन स्टुडिओज् निर्मित ‘जग्गू आणि जुलिएट’ या चित्रपटातील एक धमाल एनर्जेटिक गाणं ‘भावी आमदार’ रिलीज झाल्यापासून सोशल मीडियावर प्रचंड ट्रेंडिंगमध्ये आहे.
अजय- अतुल यांची म्युझिकल ट्रीट असलेल्या या गाण्याने फक्त एका दिवसातच मिलियन व्ह्यूजचा टप्पा पार केला आणि सोशल मीडियावर नुसता धुमाकूळ घातला आहे. या गाण्याची हवा नुसती भारतात नाही तर परदेशातही जोरदार वाहतेय. अलीकडेच परदेशी रील स्टार रिकी पॉन्ड या गाण्यावर थिरकताना दिसला होता. यानंतर आता आफ्रिकेतही या गाण्याने कल्ला केलाय.
‘जग्गू आणि जुलिएट’ या चित्रपटातील या गाण्यात उपेंद्र लिमये, अमेय वाघ, वैदेही परशुरामी, जयवंत वाडकर यांच्या सोबत अख्खा कोळीवाडा नाचताना दिसतोय. महाराष्ट्रातील काही मतदार संघात सध्या पोटनिवडणुकीच्या पार्श्वभूमीवर हे गाणं जोरदार व्हायरल होत आहे. अजय- अतुलचं भन्नाट म्युझिक आणि अतुल गोगावले यांचा आवाज या गाण्याची लज्जत वाढवतो आहे. त्यामुळे सोशल मीडियावरील बऱ्याच रील स्टार्सना या गाण्याची भुरळ पडली आहे. यामध्ये रिकी पॉन्डनंतर आता आफ्रिकन स्मॅश टॅलेंट फाउंडेशनच्या चिमुकल्यांच्या हुक स्टेपचा व्हिडीओ व्हायरल झाला आहे.
‘पुनीत बालन स्टुडिओज’ने यापूर्वी निर्मिती केलेला सामाजिक विषयावरील ‘मुळशी पॅटर्न’च्या सुपरहिट यशानंतर आता ‘जग्गू आणि जुलिएट’च्या रूपात नवीकोरी रोमँटिक लव्हस्टोरी प्रेक्षकांच्या भेटीला येत आहे.
पुनीत बालन स्टुडिओज् निर्मित, अजय-अतुल म्युझिकल आणि महेश लिमये यांच्या दिग्दर्शनाची आणि कॅमेऱ्याची जादू दाखवणारा ‘जग्गू आणि जुलिएट’ येत्या १० फेब्रुवारी २०२३ रोजी आपल्या भेटीस येत आहे. तसेच या चित्रपटातील मुख्य भूमिकेत अमेय वाघ आणि वैदेही परशुरामी हि जोडी आपल्याला दिसणार आहे.
Discussion about this post