हॅलो बॉलिवूड ऑनलाईन। बिग बॉस मराठीच्या चौथ्या पर्वाची प्रेक्षकांनी घोषित केलेली विजेती अभिनेत्री तेजस्विनी लोणारी सोशल मीडियावर प्रचंड सक्रिय आहे. देवमाणूस २ या मालिकेनंतर बिग बॉसच्या चौथ्या पर्वाने तिला विशेष प्रसिद्धी मिळवून दिली आहे. हाताला झालेल्या दुखापतीमुळे तिला या शोमधून बाहेर पडावे लागले. मात्र सोशल मीडियावर तिचा चाहता वर्ग दिवसेंदिवस वाढताना दिसतो आहे. तेजस्विनीने शेअर केलेली प्रत्येक पोस्ट प्रचंड व्हायरल होत असते. नुकतेच तेजस्विनीने श्री तिरुपती बालाजीचे दर्शन घेतले आणि हा अनुभव तिने सोशल मीडियावर एका व्हिडीओसह शेअर केला आहे.
अभिनेत्री तेजस्विनी लोणारी ही सोशल मीडियावर प्रचंड सक्रीय असते. त्यात बिग बॉसच्या घरातून बाहेर आल्यानतंर ती शेअर करत असलेली प्रत्येक पोस्ट चर्चेत दिसते आहे. तेजस्विनीने नुकतेच श्री तिरुपती बालाजीचे दर्शन घेतले आणि याची माहिती तिने सोशल मीडियाच्या माध्यमातून दिली. एक व्हिडीओ पोस्ट शेअर करत तिने तिरुपती बालाजी मंदिराची एक सुंदर झलक आपल्या चाहत्यांना दाखवली आहे. त्याबरोबरच तिने या मंदिराबाहेर काढलेले काही फोटोदेखील या व्हिडिओमध्ये शेअर केले आहे. सोबत तिने एक कॅप्शन देत आपला अनुभव शेअर केला आहे.
या व्हिडीओसोबत तेजस्विनीने कॅप्शनमध्ये लिहिले आहे कि, ‘नुकतीच श्री तिरुपती बालाजीच्या दर्शनाला गेले होते. तिथे जाऊन खूप छान वाटलं. प्रत्यक्षात बालाजीचे अखंड रूप पाहताना, अंगावर शहारा आला. या देवस्थानाची एक वेगळीच ऊर्जा आहे. नवीन वर्षाची उर्जात्मक आणि सकारात्मक सुरुवात करण्यासाठी एका विलक्षण अनुभूतीचा आनंद मी घेतला. माझ्यावर प्रेम करणाऱ्या माझ्या प्रेक्षकांसोबत मला हा अनुभव शेअर करायचा होता. तुम्ही माझे कुटुंब असून तुमच्या सर्वांच्या वतीने मी बालाजीचे दर्शन घेतले आहे. माझ्यासोबत तुम्हा सर्वांचेही नवीन वर्ष चांगले जावो अशी मी प्रार्थना केली आहे. आपण असेच एकत्र आणि वेगवेगळ्या माध्यमातून संपर्कात राहू. गोविंदा रे गोविंदा..’
Discussion about this post