हॅलो बॉलिवूड ऑनलाईन। आज १६ जून २०२३ रोजी ओम राऊत दिग्दर्शित ‘आदिपुरुष’ हा सिनेमा प्रदर्शित झाला आहे. या सिनेमाच्या पोस्टर, टिझर आणि ट्रेलरनंतर नेटकऱ्यांनी जोरदार ट्रोलिंग केले होते. इतकेच काय तर हा सिनेमा रिलीज होऊ नये म्हणून निदर्शने झाली. पण अखेर आज हा सिनेमा प्रदर्शित झालाच. या सिनेमात प्रभास, क्रिती सेनॉन, सैफ अली खान, सनी सिंग, देवदत्त नागे अशी तगडी स्टारकास्ट असल्याचे टीझरमुळे समोर आले. यानंतर आज रिलीजनंतर सिनेमात शूर्पणखेच्या भूमिकेत प्रसिद्ध मराठी अभिनेत्री दिसल्याचे समोर आले आहे. हि अभिनेत्री दुसरी तिसरी कुणी नसून तेजस्विनी पंडित आहे.
बिग बजेट सिनेमा आणि तगड्या स्टारकास्टला तोडीस तोड ठरत मराठी अभिनेत्री तेजस्विनी पंडिताने या सिनेमात शूर्पणखेची भूमिका साकारली आहे. शूर्पणखा हि रावणाची बहीण होती आणि तीदेखील रामायण घडण्यामागील कारणांचा अत्यंत महत्वपूर्ण भाग आहे. तेजस्विनीने हि महत्वपूर्ण भूमिका साकारत ‘आदिपुरुष’च्या निमित्ताने रुपेरी पडद्यावर कधीही न साकारलेली एक वेगळी भूमिका साकारली आहे. कथांनुसार, शूर्पणखा ही राक्षसीण होती आणि तिचे स्वरूप अक्राळ विक्राळ होते असे आपण जाणतो. ती भूमिका तेजस्विनीने साकारली आहे आणि अतिशय योग्य पद्धतीने या भूमिकेला तिने न्याय दिला आहे.
आज ‘आदिपुरुष’ प्रदर्शित झाल्यानंतर तेजस्विनीने स्वतःचा आनंद व्यक्त करताना अधिकृत सोशल मीडिया हॅण्डल इंस्टाग्रामवर एक पोस्ट शेअर केली आहे. यामध्ये तिने शूर्पणखेच्या लूकमधील एक फोटो शेअर केला आहे. सोबत तिने कॅप्शनमध्ये लिहिले आहे कि, ‘जे आयुष्यात कधी केलं नाही ते चित्रपटामध्ये करुन घेतलं. म्हणून इतरांच्या गोष्टीत नाक खुपसू नये. मला ‘आदिपुरुष’मध्ये शूर्पणखाच्या भूमिकेत पाहा’. तेजस्विनीने हि पोस्ट शेअर करताच यावर अनेक कलाकार मंडळी तसेच नेटकऱ्यांनी आणि चाहत्यांनी कमेंट केल्या आहेत. एकाने तर असेही म्हटले आहे कि, ‘शूर्पणखा इतकी सुंदर होती का..?’
Discussion about this post