हॅलो बॉलिवूड ऑनलाईन। सध्या बिग बॉस हिंदीच्या १६ व्या पर्वात शिव ठाकरे सगळ्यांनाच चांगला भिडतोय. या पर्वाची ट्रॉफी शिव जिंकण्याची शक्यता देखील वर्तवली जात आहे. अशातच खूप स्ट्रॉंग वाटणारा शिव गेले काही दिवस भावनिकरित्या कोलमडताना दिसला. अखेर बिग बॉसने त्याला मन मोकळं करण्याची संधी दिली.
यावेळी घरच्यांच्या आठवणीत तो रडला. पण याच वेळी रडताना त्याने त्याच्या विनीचं म्हणजेच वीणा जगतापचं नाव घेतलं. यामुळे ब्रेकपनंतरही त्यांच्यात प्रेम आहे याची कुणकुण लागली. त्यानंतर आता वीणानेही इंस्टा स्टोरी शेअर करत त्याला आपला पाठिंबा दिला आहे.
बिग बॉस १६ गाजवता गाजवता शिव ठाकरे घरच्यांच्या आठवणीने व्याकुळ झाला. यावेळी जेव्हा तो बिग बॉससमोर व्यक्त होत होता तेव्हा त्याने कुण्या आपल्याच्या मिठीची गरज आहे असे म्हटले. यावेळी बिग बॉसने त्याला ‘तुला वीणाच्या मिठीची गरज आहे का.? तुला बोलायचं आहे का? असे विचारले आणि शिवने हो वीनीसुद्धा चालेल.. ताईसुद्धा चालेल असे म्हटले.शिवचा हा व्हिडीओ सोशल मीडियावर प्रचंड व्हायरल झाला. यानंतर अनेकांनी वीणाच्या फोटोंवर शिवला सपोर्ट कर, पुन्हा एकत्र या अशा कमेंट केल्या. यांनतर आता वीणाने शिवाचा हा भावनिक व्हिडीओ इंस्टा स्टोरीवर शेअर करत त्याला धीर दिला आहे. तिने यावर लिहिलं आहे कि, ‘वाघ आहेस तू.. रडू नाही अजिबात.. मी आहे सोबत नेहमी’.
बिग बॉस मराठीच्या दुसऱ्या सिजनमध्ये शिव ठाकरे आणि वीणा जगताप यांची जोडी प्रचंड गाजली. या घरातली त्यांची केमिस्ट्री प्रेक्षकांना फारच आवडायची. बिग बॉसच्या घरातच शिवने विनाबद्दल वाटणाऱ्या भावनांची कबुली दिली होती. शिवाय बिग बॉसच्या घरातून बाहेर पडल्यानंतर त्यांनी त्यांच्या नात्याची अधिकृत कबुली दिली.
मात्र काही काळानंतर त्यांच्या ब्रेकअपच्या चर्चा रंगल्या. त्यांचं नातं फार काळ टिकलं नाही. शिवाय आपले ब्रेकअप झाल्याबद्दल दोघांनीही माहिती दिली होती. इतकेच काय तर वीणाने शिवसाठी केलेला टॅटूदेखील काढून टाकला. यानंतर आता जेव्हा भावनिक झाल्यावर शिवने वीणाच्या नावाचा उल्लेख केला तेव्हा कुठेतरी प्रेम बाकी आहे.. अशी शंका वाटू लागली आहे.
Discussion about this post